2025-04-24 13:00:00

網上熱話｜港男食台灣菜驚見三尖八角雞蛋質疑店家用零食蛋老闆回應惹網民圍剿

近年不時聽到香港飲食業處於寒冬期，只因生意差之餘，成本又一直提高，要站得住腳的確需要唔少實力，但同時一班食客又認為部分店舖之所以做唔住，全因服務差兼出品無心，引來唔少爭議。日前一位港男幫襯一間唔少分店的台灣餐廳時，就驚見便當上的雞蛋呈「三尖八角」的形狀，質疑店舖竟然用零食蛋取代真蛋。

港男食台灣菜驚見三尖八角雞蛋

日前，一位港男在社交平台上發文，指自己近日在幫襯一間在香港有不少分店的台灣餐廳時，就發現自己的肉燥便當中有一隻呈「三尖八角」形狀的雞蛋。從他上傳的照片中，可見雞蛋的Size比正常的較細小，而且蛋的邊沿部分並不平整，猶如一隻六角雞蛋。

質疑店家用預製零食蛋

發文者就認為雞蛋之所以會呈現這個形狀，全因店舖未有用真蛋入饌，而選用「零食蛋」即開即賣，令他嬲爆表示「真係燥，連隻蛋都係零食嘅就咪X學人開餐廳啦」。

老闆現身附圖回應

其實近年不少人都爭論有食肆用「預制菜」當新鮮餸賣的情況，所以發文者的帖文亦引來大批網民關注，不少網民更紛紛呼籲他「開名」方便「抵制」與「罷食」。而店家本尊亦有現身回應，先「多謝你嘅意見同反映，明白相中滷蛋會令你擔心食安問題」，隨後就附圖解釋指「我地嘅滷蛋名叫『五香滷蛋』，原產地台灣，經進口商送到香港」、「滷蛋係packing過程中，會用真空包裝形式以保持食物品質，但同時亦可能經真空過程，令滷蛋變型，賣相醜左」，最後更承諾「我地會搜尋其他台灣供應商，希望可以搵到有更好嘅滷蛋帶俾大家」。

網民唔收貨：連隻滷蛋都要嗌貨，不如唔好做啦

不過網民對店主回應並不收貨，揚言「唔係食安問題喎係客人expect 係餐廳食到嘅滷蛋唔會係7仔買到果啲滷蛋呀！連隻滷蛋都要嗌貨，不如唔好做啦。」、「自己買啲蛋返嚟滷好過啦滷水又唔係難整呢啲咁多化學劑嘅嘢盡量少用啦」，亦有人表示：「連隻蛋都要預製🤯🤯仲夠膽死收70蚊..」、「所以每次出去食拉麵、見到流心、糖心蛋、都一定加分。人地起碼真係有番少少誠意🤣🤣🤣真空預製蛋真係不知所謂。」