後來的他/她們
有關韓國女團NewJeans同公司嘅官司，近日韓國有律師有以下睇法：「這是一個投入數千億元的龐大產業，運作必須依據嚴謹的契約關係，絕不能想得太簡單。契約期間必須遵守。公司在契約期間內也投入了鉅額資金，如果在毫無任何投資的情況下就獲得成功，或許還能稍具說服力；但『因為有了成果就要跟別人合作』這種說法，在法律上根本站不住腳。」律師們仲形容NewJeans「如今正以錯誤的方向，朝懸崖邊全力疾走。」
娛樂圈係一個好有趣嘅產業，融合商業、政治、技術等元素，但同時亦有好多感情同人性。其實「在商言商」四個字唔係魔鬼，亦唔代表商業大過一切，而係喺商業社會，係要有法律邏輯先運作到。在商言商同重情重義亦唔係必然對立，重點係要分得開幾時係商業，幾時係情義。因為情義而妖魔化在商言商，同因為利益就不講情義一樣，對人有害。
後來的他/她們
對NewJeans有感而發，係因為上個禮拜睇完MIRROR鷹小組演唱會，佢哋唱咗首《後來的我們》引發一連串有關續約嘅討論。我夠膽預測，12子到時一定有人會續，有人唔續。我冇七師傅嘅功力，呢個只係歷史嘅軌跡，香港以至係韓國嘅男女團，可以活躍超過10年嘅好少，當年Cookies由9變4再散埋都只係玩咗4年。
我亦都預計到時實會有人會話︰「一早走啦，間公司咁差！」同時亦會有人會話「公司將你哋由零變一，而家成功就唔續約咁衰架！」兩種講法其實都係情緒式反應，事實上續唔續約，可以唔關個藝人衰唔衰事，亦唔關公司好唔好事，而只係簡單嘅：「自然定律」。
容我引用五月天《我心中尚未崩壞的地方》兩句歌詞，歸納一下呢個追夢嘅行業：
「當人心變成市場，當市場變成戰場，戰場埋葬多少理想？」
「無論天后或天王，無論小兵或老將，曲終人散都要蒼涼。」