黎諾懿獲邀出席金融保險活動，自言「穩陣派」的他，原來投資上也出現過「黑歷史」，他說：「年少時曾因為太進取，響股票巿場損失過百萬，險一舖清袋！廿幾歲時好冒險，學人買仙股、消息股，只要人哋話有內幕消息，我就會投資，結果有次輸咗過百萬，當時非常肉赤，唯有響失敗中吸取教訓。依家有咗家室，個人理財同投資取向都趨向保守同小心，事事以家庭為中心，會選穩健、低風險產品。」現時環球經濟倒退，黎諾懿直言會選擇儲蓄得來、回報又好過放銀行收息的產品。
黎諾懿不時在社交平台上載仔仔黎峰睿(小春雞)的生活照片，問到可有為兒子準備儲蓄基金，他即「嚴父」上身稱：「只買咗醫療保險俾佢，儲蓄基金、教育基金都冇買，作為父親，除咗基本生活所需，唔會俾佢太多嘢；我想訓練佢獨立啲，作為男仔應該靠自己爭取，自己去諗辦法賺錢，我同太太方向一致，唔想小春雞成為二世祖。」
限時早鳥優惠 火速訂位 | am730母親節溫馨晚宴 $5000福袋等你拎!
