何猷亨唱《記憶棉》挑機黃百鳴？ 演出片段瘋傳網民讚「很難不被圈粉」
已故賭王何鴻燊嘅四房公子何猷亨，去年底出席陳百祥生日會，席間同前星夢一姐菊梓喬合唱，Hana邊唱邊甜笑立即惹來陣陣疑雲，更有人大爆猷亨原來係Hana fans，不禁令人諗返猷亨同過曾經係TVB力捧小花嘅陳瀅傳過緋聞，似乎TVB同唔少香港人一樣，對大台女藝人相當支持。
何猷亨同得Hana合唱，歌喉當然唔係朱主席之流啦，過去猷亨喺母校華仁以至近年出任董事會成員嘅保良局活動上，都有唱返兩咀。近排有網民就將猷亨喺家族旗下酒店春茗上再展靚聲嘅片段，仲要選唱MC張天賦嘅《記憶棉》，即使高音假音都游刃有餘。需知道《記憶棉》係考牌神曲，邊個唱親都會被加持，原唱MC，紅！《中年好聲音2》嘅譚輝智，連拉姑都係fans！仲有黃百鳴，直情令Gen Z都為之瘋狂。難怪有網民話，聽到日理萬機嘅猷亨抽空出席春茗仲要唱歌助興，「很難不被圈粉」。同一片段中，何猷亨仲唱埋陳奕迅嘅《讓我留在你身邊》，犀利。
喺英國倫敦大學國王學院工商管理系畢業嘅何猷亨，近年打理家族酒店業務之外，前年為澳門電影《與你相遇的日子》作特別演出。唔知猷亨有冇興趣好似二房三房家姐何超儀同何超蓮咁，試下幕前發展？
原文刊登於 Yahoo 娛樂圈
入App免費換走健康產品
