2023-06-29 14:16:34

全民造星V｜Snoopy Tsoul殺入總決賽 10強拉隊澳門拍特別篇

ViuTV選秀節目《全民造星V》正展開20強賽事，希晉﹑Taco﹑王鋒﹑Lyman﹑亨仔已先後殺入10强之列，昨晚播出一集，首先出場進行對決的是同屬「蕾安多芬」的Tiger Foo（符紀男）及來自台灣的Snoopy（詹仕偉）。

Tiger Foo落敗

感性的Tiger Foo在賽前錄影自言沒有想過自己可以行到咁遠，Tiger表示好開心識到同組隊友，尤其Nathan﹑Kim及阿霆，彼此在短短時間內好似相識10幾年，好神奇，冇諗過會發生，我都唔想呢一切完，而Tiger Foo的表演項目是《The Backroom》，他先蒙眼演出，之後鬆開綁帶自彈自唱，可惜表現未如理想，評判Edward Chan表示：「我今次都直接啲，你知唔知你唱嘅時候，你把聲係偏尖到不得之了，喉頭高，你打側唱，條頸好緊好緊，呢啲全部係聲音太尖時會發生嘅事，所以呢個表演我唔可以話好Enjoy。」另一評判泳兒亦認為Tiger未能駕馭歌曲，故未必connect到觀眾。相反Snoopy的演出獲得好評，從台灣來港後，他的廣東話進步不少，開心認識到不少參賽者好友，今次Snoopy找來已被淘沙的Jason Loi合作原創歌《Rise Up》，兩人更同台打鼓較勁，最後Snoopy也獲得評判5盞燈，順利躋身總決賽。落敗的Tiger被Snoopy從後攬住返入後台，此時好兄弟Nathan即感觸落淚，Tiger並跟幾位好友逐一相擁。

Adams自封Jennie

其後，輪到Tsoul（田曜誠）跟Adams（何居倬）對決，兩人均以勁舞迎戰，Adams出場前獲組員及導師大叫「Jennie」作鼓勵，原來他每次站台也將自己當作BLACKPINK成員Jennie、Rose等，而Adams以就揀選《Bad Romance》跳唱表演，當Adams完成表演項目之後，被評判馮穎琪以海綿來形容，覺得他吸收能力強，而且可以很快上手。緊接出場的Tsoul一直是長勝將軍，以Popping演繹《智能（AI）判變》，精彩演出贏盡讚賞，並以5盞燈打入10強，Adams對於未能晉身決賽坦言：「一定有少少唔開心，好似走唔到最尾，但又好似放鬆落嚟，有釋懷感覺，的而且確係幾頂尖對決，因為Tsoul做咗個好精彩嘅表演，令評判留下深刻印象，我覺得都係雖敗猶榮。」10強名單尚餘三人暫未公布，已證實進入決賽的計有希晉﹑Taco﹑王鋒﹑Lyman﹑亨仔﹑Snoopy、Tsoul，ViuTV將於星期六晚播出《全民造星V》特別篇，安排10強組團到澳門取景，星期日就會舉行10強記者會。