![](https://cdn.am730.com.hk/s3fs-public/styles/article_image/public/2023-08/80c40631-3019-11ee-96fd-85e493ca2bf9.png?itok=e1-fpxHP)
已經開幕嘅動漫節係cosplay界嘅重要活動,唔少coser都會以動漫人物造型現身。網路創作團隊試當真嘅阿慈同Stone唔止以大熱作《我推的孩子》嘅人物造型出場,仲直情將其中一幕搬到現場,但就嚇親現場人士同網民。
影相時有人「襲擊」阿慈
動漫節第一日,阿慈以《我推的孩子》主角星野愛嘅造型到場,同Stone以及在場fans影相,期間突然有人「持刀」衝去「襲擊」阿慈,後來有日本警察造型嘅coser制服「持刀」男子。
被批影射荷里活廣場斬人案
成件事拍晒片放上網,有人認為係低級趣味,而且令人聯想到早前鑽石山商場斬人案。但係呢段情節其實係《我推的孩子》入面,身為偶像嘅星野愛被狂迷用刀襲擊死亡嘅情節,亦係成個故事極之關鍵嘅一幕。因此,有唔少有睇《我推的孩子》嘅網民留言,話唔明白其他人點解要鬧阿慈同Stone。而喺呢次動漫節「命案」度飾演行兇者嘅試當真成員潘宗孝,都有解釋返係還原原著情節。
原文刊登於 Yahoo 娛樂圈