縱然亞洲動作片大有進步，荷李活出品仍是超班馬，出色動作特技效果，除咗有賴CG後期加工之外，仲要多得一班特技替身(Stuntman)，而早喺上世紀1978年，《Hooper》以知名武術指導兼動作特技替身Sonny Hooper一生為題，以喜劇形式揭示荷李活特技替身背後辛酸。不過，特技替身都有捱出頭嘅成功例子，如劉家良、元奎等「七小福」成員都是由龍虎武師做起，再升格為演員或國際級武術指導，而荷李活成功例子更多不勝數，但要數到近年上位最快嘅，就一定係畢彼特「御用」替身兼新片《原子殺姬》導演大衛雷奇(David Leitch)。文：Wing Lam
《搏擊會》畢佬替身
要成為一位好嘅動作片導演，最基本條件就係要識打。大衛雷奇九十年代入行，第一次現身大銀幕就係95年為美劇《Sherman Oaks》擔任動作特技演員，至1998年先有機會飾演一個有名有姓嘅角色。99年佢首次於《搏擊會》擔任畢彼特動作替身，期後更成為畢彼特2.0，先後於《盜海豪情》、《諜戰》、《木馬屠城》及《史密夫決戰史密妻》擔任畢佬替身。雷奇入行二十多年，曾經為逾80部電視劇及電影擔全特技動作替身或武術指導，當中包括《廿二世紀殺人網絡》系列、《妖夜尋狼》系列及《變種特攻：狼人外傳》等知名賣座電影。雖然佢已經係動作片界老前輩，不過，佢嘅名字直到2014年嘅《殺神John Wick》先為觀眾所知。
鍾情港產動作片
其實準確嚟講，應該係《殺神》上映後，雷奇先為人所識。該片係佢首部執導作品，而事實上佢只係負責動作指導，不過因為動作效果一流，令荷李活片商都開始留意呢位潛力動作片導演。佢之所以憑《殺神》彈起，大抵係因為動作設計罕有地融入亞洲武打元素，如日本武士道、早年港產武俠片及九十年代經典動作片等；而由影后型女查理絲花朗主演嘅《原子殺姬》，單係睇預告已經聞到《殺神》陣除，無論係美指、故事設定、角色造型抑或動作設計，《原》片都有如《殺神》2.0。
占士麥艾禾x查理絲花朗
其實雷奇早喺幾年前已開始籌備《原》片，原本計劃同Chad Stahelski再次聯合編導，不過Stahelski後來因為執導《殺神2》而退出，令《原》成為雷奇個人首部執導長片。此片改編自英國暢銷漫畫小說《The Coldest City》，查理絲花朗早喺5年前開始籌備，佢唔止擔任監製，仲做埋主演——冷戰期間英國軍情六處嘅首席女特務露溫保杜(Lorraine Broughton)，故事講述露溫被派往柏林追尋一份消失的間諜名單。此片除咗有影后坐鎮，仲有上位真．打女蘇菲亞寶堤拉，以及於《思．裂》中演技備受讚許嘅占士麥艾禾主演，演出方面有信心保證。
入App免費拎荷花BB展入場券
