鄭國江展示他的歌詞手稿。
無綫娛樂新聞台《StarTalk》主播許文軒(Edmond)，近日訪問著名填詞人鄭國江，大談即將舉行作品展音樂會的感受。鄭Sir特別感謝一眾歌手，百忙抽空出席，他說：「疫情過後有好多騷，佢哋都特登抽個期出嚟，有啲好似曾路得同陳美齡仲喺外地返嚟，好多謝佢哋，好開心可以再見返啲朋友！」
偏愛《阿信的故事》歌詞
有勵志詞人美譽的鄭國江，覺得歌詞可以感動到好多人，自己就比較偏心《阿信的故事》一曲，他說：「歌詞話命運是對手永不低頭，就好似我哋一路要堅持嘅態度。有時我都值住歌詞去鼓勵自己，因為自己係一個細膽嘅人，成日要自己鼓勵自己。有一個例子，就係有一個人走埋嚟多謝我，原來係我嘅小學學生，佢話遇到不如意嘅事後，就收埋自己，連父母都唔想見，但當佢聽咗陳百強嘅《飛出去》，佢立即改過去搵工，重新生活。原來歌曲係有一個影響到人嘅作用，只不過係我哋唔覺。」
填過逾2,000首歌的鄭國江，偏愛《阿信的故事》的歌詞。
夥劉松仁為宗教劇《利瑪竇》填詞
鄭Sir縱橫詞界接近50年，到現在依然不停工作和接受新挑戰，他說：「好似泰迪羅賓嘅歌《點指兵兵》，通常比較重型，而自己就比較鍾意聽粵曲，所以對於佢嘅音樂比較陌生，但好好玩，俾自己一個創作嘅衝擊同學習。(好少會推人Job？) 都唔係！之前劉松仁邀請我參與一個宗教劇《利瑪竇》，呢一個係好認真嘅topic，不容有失！但我有個信念，人哋信得過自己先至交樣嘢俾你做，點解信唔過自己？只希望自己有能力做到。」
amFUN聖誕狂賞🎁狂送UNICO迷你遊戲機、主題公園門票、Panasonic鏡燈👉
