第一集，短髮，好睇。第二集，長髮，好弊。第三集，剪番短髮，又好睇番。第四集，留番長髮，又稍為跌watt。到第五集，頭髮唔長唔短，精彩程度中規中矩。你知道嗎？原來世間上有一系列電影，只要觀眾留意主角的頭髮長度，就可以估計到有幾好睇。下星期上映的第六集，照推斷，應該睇得過。
文：AnnLo
打從第一集《職業特工隊》，至今已經22年，縱然每集都離不開「被質疑→被孤立→被追殺→化險為夷→完成任務」這條公式，但依然有大班忠粉支持，造就5集累積近28億美元票房，躋身電影史上二十大賣座系列。有別於頭三集的純個人主義，由第四集《鬼影約章》起，《職》系列開始加入具份量兼孭較重戲份的演員，包括謝洛美維納及艾力寶雲，卡士更具睇頭之餘，劇情亦得以延伸更多支線。正如今集《叛逆之謎》，就增添了「超人」亨利卡菲爾，飾演大大隻好打得的CIA特工，被委派監察靚佬湯(即係主角伊頓)，期間當然有不少衝突。睇trailer廁所肉搏一幕，六嚿腹肌的超人硬撼打不死的特工，赤手空拳將磚牆、座廁、水喉等統統打爆，好誇張，但又幾好睇。
靚佬湯以時速200哩一躍而下，還必需準確地與攝影師保持3呎距離，才能捕捉完美畫面。
就是這一跳撞到腳踝骨裂。
為拍攝直升機追逐戰，靚佬湯事前跟隨多位教練，接受密集式飛行特訓。
愈玩愈大
假如你已年過半百，在荷李活有財有勢，拍攝危險動作場面還會親身上陣嗎？我當然唔會/敢，但靚佬湯會/敢，而且仲愈玩愈大，近乎玩命。近幾年，靚佬湯拍戲更加唔錫身，爬過全球最高的哈利法塔，又攀附正在起飛的A400軍用機之後，今次再去盡啲：從25,000呎高空一躍而下及駕駛直升機在雪山之間追逐。
片中一幕呈現的「空軍特種戰術跳傘」，屬於「高空低開」(HALO，High Altitude Low Opening)一類，即是在25,000呎跳下，降至2,000呎低空時才打開降落傘，目的是為了避過敵方偵測，投放軍人及軍事器具。為免拍攝時因缺氧或氣壓導致失去意識，靚佬湯事前要接受一系列特訓，例如利用特製風機，先適應模擬萬呎高空上的惡劣環境；之後到拍攝地阿聯酋首都阿布扎比，向當地軍隊借出軍用及多用途運輸機作綵排，每日早上跳傘5次，下午3次，無間斷持續超過1個月。
至於另一場直升機追逐戰，是在新西蘭的南阿爾卑斯山脈拍攝，最困難又危險之處，是靚佬湯要一身兼三職：機師、攝影師和演員，既要獨自駕駛直升機飛越峽谷，貼地低飛及應付迂迴曲折的河流，亦要兼顧拍攝角度，仲要演繹角色，就連監製Myers都話：「我們以往跟湯完成的特技，絕大多數都設有安全機制，可以在最後關頭救他一命，但今次完全是取決於他自己，一有失誤就玩完。」
腳踝骨裂 極速復工
拍動作場面往往親身上陣，受傷自然在所難免，靚佬湯在倫敦拍攝一場相對簡單的跳天台戲時，不慎撞傷腳踝，然而他當時未有停下來個「尼馬式翻滾」，而是堅持在鏡頭前完成整套動作。及後經醫生檢查後證實腳踝骨裂，預計需要9個月才能痊愈。之不過他為免耽誤拍攝進度，於是每日花10至12小時接受物理治療和訓練，結果在6個星期後極速復工。今時今日的他還有這份意志和熱情，才是真正的「不可能」。
大隻「超人」亨利卡菲爾與靚佬湯在廁所打到飛起。
今集除了編導基斯杜化麥哥利有得留低，還有女主角莉碧嘉費格遜。
立即更新/下載AM730手機APP 體驗升級功能
