2025-04-21 15:06:48

呂爵安開Live 直言近半年過得不開心首度確認林明禎地位：佢係我身邊好重要嘅人

呂爵安(Edan)、岑珈其、魏浚笙(Jeffrey)、徐浩昌(肥腸)、黃正宜(阿正)及劉沛衡(Hillary) 6位《膠戰》成員，昨晚(20日)假灣仔會展舉行《膠戰RUN FOR YOUR LIVE》，吸引近8.000人入場支持。完騷回家後，Edan未有休息，反而邊食宵夜邊開直播，並與爵屎(粉絲暱稱)分享近半年的心情，直播歷時接近個半小時。

Edan自去年11月爆出與大馬女神林明禎的緋聞後，一直是非多多，其感情事備受網民及傳媒高度關注。早前，他在訪問中聞「女友」二字更即黑面，斥傳媒黑心，不過，昨晚在完騷後接受訪問，他則以輕鬆心態回應：「大家見咗咁耐，都係講吓笑啫！」
直播中，Edan 透露心聲表示過去半年經歷了很多事情，坦言過去半年過得並不開心，一直以為自己很理性，但原來也會emo：「呢半年都幾封閉自己，好綁手綁腳、好多人指指點點，一直好多內心鬥爭，唔知點好。」他又指直播向來是他與爵屎溝通的方法，很想透過直播與大家溝通，但又驚失去：「講到尾都係驚，驚會失去。因為嗰一次意識到我會失去啲嘢、影響啲嘢。」
他提到最近重溫第一次solo演唱會，看到自己曾在台上講自己是「ED 偶像」，有感自己當時初生之犢不畏虎，但後來才發現自己太天真：「原來我口口聲聲話唔驚，原來我都係會驚，唔夠堅定，未知自己想要咩、成為咩人。」

28歲搵到錢卻迷惘

Edan表示，現在工作能照顧到生活，但卻越來越迷惘，同時亦沒有特別感到開心，或許是入行7年不自覺累積下來的壓力。他坦言近來最困擾的是面對傳媒：「我係公眾人物我理解，要有啲嘢畀人講下，你問我會盡量配合，但如果係一啲網民講嘅嘢，你寫然後標題，你又要我去回應，但真係唔係嗰回事，我都唔知點去處理。我都發覺其實無辦法，我唔想再被呢啲嘢影響。同埋最奇怪、棘嗰個位係平時採訪大家都關係好、會講笑、影相簽名，但返到去點解新聞會咁寫？我明白係好juicy ，好多人想問、想講，但我一直覺得感情唔需要講咩，我都28歲人，鍾意人有咩問題？就算我媽媽問我，以前中學問我有無鍾意啲咩女仔，我都唔會講。」
Edan 又公開提到林明禎，他表示曾見到有網友說新歌是為林明禎而寫，並無奈表示新歌歌詞是由Wyman(黃偉文)操刀，完全不是他的意思，更指收到不是DM用十分難聽的字眼罵對方， Edan續首度向爵屎確認林明禎的地位：「佢係一個好好嘅女仔，亦都係我身邊好重要嘅人，可能係我嘅性格，我唔希望見到呢啲，我覺得同你哋講咗，同你哋無呢個誤會，以後出面點講，我都唔需要再講咩，我淨係care我想care嘅人。」

望fans同行抵抗負能量

Edan指，很多惡意的信息及負能量不停發生，開始承受不到，現在只希望專注自己，做好自己的工作，成為更加專業的人，並坦言覺得自己正經歷緊人生其中一個很大的課題：「喺度學緊應該點樣行，未來應該點樣去做，以後呢世人嘅目標係點。我想應承大家一件事，我今日決定做呢件事，開得呢個live，我想打開自己，我想對一直咁愛我嘅你哋(爵屎)分享我嘅感受，想話俾你哋知，我想做我想成為嘅人，想進步、做得更好，做自己認為正確嘅事，我想拎返勇氣。之前話做偶像好難行，我而家知道有幾難行，但就算知道我都想行，希望大家可以陪我過呢個過程。」