![](https://cdn.am730.com.hk/s3fs-public/styles/article_image_with_watermark/public/2023-05/TUNG1182.jpg?itok=RbeP3mGm)
泳兒今年首支派台歌《同歸於盡》,歌名負面,但歌詞卻包含愛意。
泳兒去年音樂成績大豐收,奪得「叱咤樂壇女歌手」銀獎兼獲港台頒發「十優」歌手。事業得意,與髮型師男友Ziv拍拖11年,感情又穩定,身邊的人都不停催她結婚,而她早前上載婚戒照,加上一句「我願意」,人人都以為他們的愛情修成正果,原來都只是預告新歌《同歸於盡》。泳兒受訪時,問到何時結婚,她表示暫未有打算,男友也未有求婚,但她坦言構思這首歌,是希望用作求婚之用,莫非她想憑歌寄意,向男友作出暗示?
愛到無盡一生一世也不夠
泳兒坦言若另一半跟她說︰「是否願意跟我一齊同歸於盡?」會是一件很浪漫的事。結婚本是開心之事,為何要用上這個帶死亡意味的字?泳兒認為若果人生找到一個可以跟對方愛到無盡,愛到直至大家死去,甚至不止一生一世,而是三生三世,是很值得慶賀的事。「人人都會去到一個生命嘅盡頭,唔係淨係自己包括身邊嘅人啦,寵物,總會有一天會離開你嘅一日。如果喺愛情路上遇到一個想同佢一生一世或者三生三世,當你幻想有一日佢會離開你嘅時候,你都會好害怕箇中寂寞。」
何解要愛到三生三世?泳兒表示因為大家都很愛,愛到希望來世都可以再續前緣,而這種愛是要經得起考驗。「我覺得大家有一定嘅經歷,可能經歷咗一啲難關,先至會知道呢個人係咪可以同你一生一世,有時開心嘅時候可以好而過,但係當你有難關或者佢有難關嘅時候,嗰個人願唔願意喺你低谷嘅時候仍然同你喺埋一齊。我覺得呢一個係一個考驗。」
![](https://cdn.am730.com.hk/s3fs-public/styles/article_image/public/2023-05/vincy%20and%20bf.jpeg?itok=jxL6tst2)
泳兒與髮型師男友Ziv拍拖11年,感情穩定。
泳兒早前在陳家樂及連詩雅的婚禮上接過花球。
人愈大愈寂寞?
雖然泳兒沒有明言是否已找到這個人,但她的男友陪伴她渡過人生低潮,包括失聲、母親中風,到現在泳兒找到自己的出路,男友依舊默默在身邊,這個人已是泳兒生命中不可缺少的人。她自言人生已經走了一半,死亡及離開這個課題面對得特別多,因此自己今年的音樂計劃都是圍繞「生死」。她說︰「尤其是過去呢幾年,發現好多嘢都唔係一定嘅,你打開social media可能見到有啲post講邊個離開咗,人又好,寵身又好,大家以為都好年青,但人愈大,有啲嘢係愈來愈近。我唔驚自己生命去到盡頭,而係好驚一啲你愛嘅人、好親近嘅人離開咗你,你點樣去接受,其實係好難接受。」
她直言自己很害怕寂寞,亦很害怕身邊的人離開,「就算做幾多心理準備都好,去到嗰一刻一定係好傷心,所以要諗依家有嘅日子,自己可以有咩做到,大家都係倒數緊,每一個人都係一日一日咁倒數。我會諗自己能力範圍內可以同對方做啲咩,見多啲你想見嘅人,陪伴多啲。」
![](https://cdn.am730.com.hk/s3fs-public/styles/article_image/public/2023-05/TUNG0998.jpg?itok=eslZR2ZP)
泳兒表示今年內未必開紅館個唱,但認為距離目標不遠了。
歌單尚欠一首
作為一個歌手,尤其是泳兒已經出道18年,上紅館當然是她最想做的事,她說︰「其實呢個都係我嘅check list入面,公司都知呢個係我好想達到嘅里程碑,但係咪今年?又未必,我覺得自己仲需要一啲,或者我嘅歌單仲爭一啲嘢。」她認為自己的歌單尚欠一首歌,而這首歌是當大家遇到某一個話題時,任何年齡層都會想起它,到這首歌出現,那個時候便是她上紅館的時候。聽上去很空泛,但泳兒不想為開而開,而是希望能透過演唱會說一個完整的故事。
40而立
近年泳兒一改歌曲風架,脫胎換骨的她大獲好評,連她也笑言人到40歲才開竅。「40歲對好多女仔嚟講好恐怖,對我來講依家先係一個最人生最自在最精彩嘅時刻。唔好以為去到年紀大啦,一定有好多嘢做唔。當接受咗嘅時候,自己係唔可以因為呢個數字而去框住自己,反而係呢一個歲數,無論係男定女,呢個時候先至會成熟,先至知道自己要啲乜嘢。」
![](https://cdn.am730.com.hk/s3fs-public/styles/article_image/public/2023-05/TUNG1225.jpg?itok=Qfna15mf)
泳兒在過去幾年一度感迷失,這段糊塗的日子,令她覺悟自己應該要如何當一個歌手。
為做而做
回想過去幾年,她指自己做歌手的心態純粹是為了生活,但個人身心各方面都沒有進步,「好似係當一個工作去做,我覺得唔係太健康,尤其是做一個歌手,唔係淨係唱好隻歌,而係做一啲自己喜歡做嘅嘢,可以做到一啲可以影響到別人嘅嘢,感染人哋嘅嘢係緊要啲嘅。」
捉緊那團火
想起參加歌唱比賽時的自己,泳兒稱當時甚麼都沒想,甚至膽粗地挑戰張惠妹的《High High High》,但入行之後,有很多事都要顧慮,令她也逐逐迷失,幸好近年自己找回當年無懼的心,這或許就是泳兒口中提到自己現在才開竅吧!她說︰「我希望嚟緊,無論做咗幾多年都好,喺唔同階段都可以搵到一啲衝擊比自己。當然賺錢係緊要,因為大家都要生存,但係點樣可以喺入邊搵到一個樂趣,令自己10幾歲、30幾歲、40幾歲嘅時候,都可以做到一啲自己喜歡做嘅嘢,,嗰團火係緊要嘅。」