倪詩蓓是張國榮的初戀女友。
今日(4月1日)是張國榮(哥哥)逝世21周年的日子，他的前女友倪詩蓓(Annie)日前(30日)接受「鬼王」潘紹聰《恐怖熱線》訪問，除了回憶當初得知對方死訊的反應，更大談圈中人經歷的靈異事件。
在節目中，潘紹聰問到倪詩蓓(Annie)當初得知哥哥張國榮的死訊後有何反應？Annie透露：「我先收到電話，嗰日4月1日，我以為講笑，所以好嬲。我同我朋友講『你無啦啦點解要講佢，同埋講呢種事。』之後睇新聞證實了。在我心目中，哥哥只是出國，去了第二個地方。」她表示哥哥當年曾送給她一隻戒指，可惜因多次搬屋，早年已不見了，她對此深感惋惜。
倪詩蓓惋惜哥哥曾送戒指不見了。
憶述台灣拍劇奇異經歷
Annie憶述當年與戚美珍、冼煥貞和潘宏彬到台灣拍攝劇集《情義無價》時的奇異經歷，經理人為他們安排了一間又大又靚的宿舍：「有一晚，我哋早返屋企，戚美珍好嬲咁樣同我哋講，『你哋每晚出街留低我都算啦。但你哋返嚟開party，仲要把所有碟掉到一地都係，廚房又唔收拾，我返到嚟就亂晒籠。』我哋就話我哋噚晚沒有回來，現在才收工回來。當時我同冼煥貞聽到，其實有少少打冷震、打個突。梳化的確冧晒，枱櫈又跌曬，廚房啲碟又爛晒。我哋本來仲諗係咪我哋唔理佢，所以佢掉爛晒啲嘢。」
過幾天，Annie等人決定不外出玩，留在宿舍陪戚美珍打麻將，但就輪到潘宏彬「出事」。「佢著住條底褲，走出嚟鬧我哋唔係人，佢叫咗好多次救命，我們都無人理佢，佢俾人壓住咗，但我哋真係聽唔到。第二日我哋拍完嘢、去完街回來，就見到成條走廊貼晒符，包括佢(潘宏彬)自己房門。」
Annie憶起當年與戚美珍、冼煥貞和潘宏彬到台灣拍劇《情義無價》奇異經歷。
分享成龍韓國經歷
Annie更分享成龍大哥當年在韓國拍戲時住酒店的經歷，「有一晚佢瞓瞓下，佢擘大對眼想去洗手間，佢張床對住換衫用的長身鏡，朦朦朧朧見到鏡中，好似有個人企喺度。感覺好似喺鏡行出嚟咁。對方着住白色衫、一把好長黑色頭髮嘅女人。好似飄埋嚟。」那個時候，成龍大哥全身動不了，「冇幾耐見到佢越飄越近，之後佢就好大聲用韓文講：『你係邊個？你想做乜？』嗰個物體冇理佢一直飄埋嚟，同佢面貼面好近，對眼瞪實他。佢好驚，但當時佢郁唔到。之後矇矇朧朧佢覺得自己瞓咗。」
之後佢又去韓國拍戲，再在酒店覺得自己又見返同樣的物體。又是凌空的飄過去跟他面貼面，他同樣瞪大眼望住佢，好嬲大叫：「『你係咪有咩事，做咩跟住我？』當時有其他人響佢間房。就衝埋去問佢做咩事。有人將他搖醒。但他覺得成件事好真實。」提到成龍大哥說起此事的原因，緣於成龍大哥在K房向Annie分享時說，「上次響美國屋企瞓着咗，昂頭睡覺，突然之間佢擘大眼，令佢諗起個場面，見到一個長頭髮的人望住他，佢就大叫，原來嗰個是嬌姐（林鳳嬌），他當時就話遲早俾老婆嚇死。」
amJetso 送BIODERMA救星小紅瓶🩷護膚恩物 立即按此參加👇
