張家輝最近為新片《重生》宣傳。
影帝張家輝最近忙於為新片《重生》四出宣傳，日前接受無綫娛樂新聞台主播王鎮泉（泉叔）訪問時，自揭是無綫王牌綜藝節目《中年好聲音》忠粉，大讚節目勵志又正面，令他追看得肉緊又開心：「我成日睇嘅，之前啱啱疫情前後，喂！唔睇佢都唔知點算好，《中二》嗰陣我集集追嘅。（你係鍾意啲故仔？）我係鍾意個節目。」說畢，向來幽默的家輝忽然反問泉叔：「你哋係咪TVB㗎？」引爆全場爆笑。
家輝續說：「我覺得呢個節目好成功，我真心㗎，呢個節目畀咗中年人一個機會，佢後面嘅故事係感性嘅，呢個係節目嘅元素，亦因為呢啲元素，令到節目好睇咗」、「我自己（睇得）好開心啦，睇到佢哋點樣進級呀、點樣好努力、點樣有啲有talent、有啲參加過就滿足，都係幾正面一個節目。」當泉叔追問家輝會否考慮上節目做評判時，家輝坦言直頭想做參賽者，並促請無綫搞藝人版《中年好聲音》，張家輝說：「我直頭想參加，唓！有冇搞錯，點解唔搞個《中年藝人好聲音》。」
深情獻唱搞喊關詠荷
不過家輝事後笑言其實自己沒有勇氣參加：「其實我唔敢呀，我唔夠架生呀，你諗吓喇，我一生可能有幾首歌唱得幾好嘅，可以攞嚟劈吓，但要進級同唱幾十首，首首仲要『Bin ling嘭難』咁走出嚟，我覺得好困難呀其實！」其實家輝過往曾在無綫節目大展歌喉，為了呼應家輝的訪問，無綫娛樂新聞台專誠剪輯了家輝當年於綜藝節目《回到未紅時》中對著愛人關詠荷高歌《真情流露》，令同場的關詠荷感動到又笑又喊，淚崩的關詠荷更一度要拿紙巾拭淚，場面感人。但搞笑的是，家輝唱到尾聲時忽然搞gag：「跟住唔鬼記得添！」並對著關詠荷說：「唔好喊啦，喊乜嘢啫，又唔係第一次唱你聽！」關詠荷即扁嘴兼大叫撒嬌謂：「我開心得唔得？！」
