由漫畫到動畫，由動畫到電影，《死亡筆記》系列可以話係中港台一眾80後嘅集體回憶，2006年上映嘅上下篇電影《死亡筆記》及《死亡筆記：最後的名字》，更加將Death Note熱潮推向高峰。10年後，該系列終於推出新版電影《死亡筆記：照亮新世紀》，當年嘅「夜神月」藤原龍也、「L」松山研一等主演幾乎換清光，惟獨是「夜神月」嘅忠實信徒彌海砂有得留低，並由戶田惠梨香再次演繹，親自為彌海砂劃上一個完美句號。女神回歸，fans當然希望喺宣傳活動上見佢一面，而我哋更有機會同戶田神之接觸，大談彌海砂10年蛻變。文：Wing 圖：陳奕釗、林俊源
am：10年後飾演彌海砂，感覺如何？
戶田：冇諗過可以重演彌海砂呢個角色，有啲不安，同時又好期待。
am：彌海砂喺呢10年間有咩改變？
戶田：呢10年間，我同彌海砂都有成長，不過我同佢嘅個性一啲都唔似(笑)。我覺得彌海砂喺今集已經成熟咗，例如佢冇再使用死亡筆記，之前佢從夜神月手中得到後就即刻使用，今集佢再次得到一本Death note，唔止冇用到，仲拒絕成為擁有者。
am：演繹方法有咩改變？
戶田：過去10年，我演繹過唔少角色，而呢10年嘅經歷及成長，幫助我重新演繹彌海砂；當然我亦希望能夠勾起觀眾回憶，當我今集再叫夜神月個名嗰陣，相信觀眾都能重拾10年前嘅感覺。
am：點樣重新投入角色？
戶田：有睇番舊版兩部作品，感覺好尷尬，發覺真係冇嘢可以戰勝時間……另外，因為今集導演同之前唔同，要同《照》片導演傾，佢認為10年後嘅彌海砂應該係點，有啲咩係得彌海砂可以帶俾《死》系列粉絲，當我哋喺各方面都有共識後，就能更易投入角色。
am：點睇《照》嘅劇本？
戶田：收到劇本之後，又開心又感慨，因為終於可以為彌海砂呢個角色劃上句號。彌海砂嘅結局唔係happy ending，我當然希望佢可以再被救贖啦。因為佢經歷過家人被殺害，當時有夜神月將佢從孤獨中拯救，但最後連佢都死埋，所以我諗，最好嘅結局係，佢再搵到一個人救贖自己。
am：新版及舊版故事劇本，你鍾意邊個多啲？
戶田：其實兩個版本都各有特色，但對我嚟講，梗係對10年前嘅版本有感情啲啦。
am：對於新版演員有何看法？
戶田：戲中有夜神月繼承者，亦有L繼承者，雖然佢哋唔係10年前嘅原班人馬，但仍演繹到兩個角色對信念嘅執著。不過，幾位新演員演出嚟嘅感覺，都唔似當年嘅藤原龍也及松山研一等。
am：同你最多對手戲嘅菅田將暉表現如何？
戶田：我哋4年前合作過，嗰陣我飾演老師，佢飾演學生，佢當時仲係個好可愛嘅男孩子，今次再合作，感覺佢成熟咗好多，演技亦進步唔少，我作為一個同佢合作過嘅演員都為佢高興。
新版《死》片，本來失咗憶嘅彌海砂，不斷被新奇拿勾起記憶。
戶田話，睇番10年前嘅自己，真係好感慨。
飾演新奇拿嘅菅田將暉，是戶田於片中的主要對手。
10年後再演彌海砂嘅戶田惠梨香，連形象、氣質都唔同晒。
新版加入了東出昌大及池松壯亮，齊齊爭奪6本死亡筆記。