2024-11-07 15:47:00

戰場上｜網民質疑節目角度欠平衡　連續2晚讓路惹腰斬傳言　黎芷珊fb被負評灌爆

黎芷珊親自走訪以色列同烏克蘭拍攝嘅節目《戰場上》，播出兩集旋即引起迴響。有網民認為喺烏克蘭報導嘅情況，立場偏重於烏克蘭一方，未有訪問俄羅斯人民睇法，並指攝製隊喺當地有烏軍協助，片尾更鳴謝烏克蘭政府籌集資金嘅平台United 24。有觀眾表明向通訊事務管理局投訴，並發起杯葛TVB行動。

碰巧美國舉行大選，TVB安排特備節目《特朗普重掌白宮》，《戰場上》因此停播兩集。有媒體報導指，《戰場上》喺TVB社交平台專頁嘅宣傳post被下架，節目亦消失於官方串流平台myTV SUPER。TVB官網本來有專門介紹《戰場上》嘅文章，但已經搵唔到，只係剩返早前節目巡禮中嘅介紹。主持黎芷珊日前喺自己FB出post宣傳新節目，但相關文章彈出「無法提供內容」。

原文刊登於 Yahoo 娛樂圈