林作專訪｜敗筆係唔夠極端有種冒險叫抽水

論近日的城中熱話，「林鍾一戰」必定榜上有名。這場擂台上的「百萬隻揪」賽果如何？9月自有分曉。在眾人眼中，從沒打過上擂台的林作是輸在起跑線，林作卻揚言已嘗甜頭，「生意翻咗七倍！」不過，這可不是撓埋雙手印印腳，既已答應作戰，林作也真找教練學打拳，早前，本報直擊他受訓情況，練到大汗淋漓手軟腳軟的他，自封為「No pain, no gain的人辦」。說他騎呢、抽水、博上位？他卻自嫌未夠極端，實行要將抽水發揮到極限！

文：Grace 圖：陳奕釗蘇文傑
場地：榮拳館鳴謝：楊家祺教練

抵到爛的挑機
訪問當天，是林作第三堂正式訓練，看他大汗疊細汗仍不斷被教練督促要「俾啲掙扎」，儘管被教練踢爆試過遲到、早退兼失蹤，這次林作不是hea練，更要被細路狂毆練閃避，難得他仍自我感覺良好，「進步神速！本來連計分、遊戲規則都唔識，依家識晒，第二次訓練時幾乎斷氣，今次啲氣長咗好多，當你以為無氣，試下推多1分鐘，你又有氣，真係要食幾拳，先識得點樣去打人，人生就係咁樣先過癮。」落場知真章，無論事業、愛情、打拳或抽水，想多無謂，行動做實際，敢冒險才有機會贏，「大家搞錯好多嘢，話林作時不時就衝出嚟抽水，錯！各位我日日都抽水，我不止向鍾培生挑機，其實我挑咗好多人機，但佢哋唔覆我啫。」一次挑機，換來一場打輸都有錢收的拳賽，還有隨知名度而來的營業額，林作直言抵到爛，「嘩，開心到不得了！真係想同大家講有危先有機，有挑戰先至有成果，唔好再坐喺度，挑機就會有回報！唔冒險，就真係唔得，我話我依家係人辦！」

靚仔過王祖藍自比周星馳
「未抽乾！係抽，希望再乾啲！」林作自評未夠盡，出得來「抽」，不怕惹抨擊，只怕你不關注，「我鼓勵網民應該多啲出聲，唔好撐我撐得太緊要！喂！邊好睇呀？大佬，成個場噓呀鍾生咁點好呢？」林作仍是一貫「別人笑我太瘋癲、我笑他人看不穿」的態度，笑迎網民尖酸留言，談到有人指他是戴了眼鏡的王祖藍，「我都見過王祖藍，我靚仔過佢好多！這是我的敗筆，我紅唔起係因為我唔夠樣衰，或者話唔夠肥，即係冇一樣夠極端，其實我都算好樣呀！又唔夠矮，肥又唔係好肥，瘦又唔係好瘦。」至於被封為「謝偉俊2.0」。他來一招順水推舟，「我覺得我比較似周星馳，他的無厘頭係用腦諗過，好認真咁度過。謝偉俊唔似有諗過度過，我都同佢都算認識，一齊拍過節目，覺得佢唔係好夠爆，除咗講佢剝衫。」林作自評為目前香港最好笑的人，並分析說：「現在香港人要的gag，一定要吸引到hater，有種抵死、摟打的感覺。唔好諗住真係搞笑啊，有點挑釁性、少少aggressive 嗰種，表面看似唔好笑，諗深一層你會覺得好笑，可能笑著喊添！」

鍾培生最大弱點係唔輸得
話說回來，上得擂台，難道想輸？「如果你想成功，你一定要好介意輸贏，打拳好啱我。」自幼受母親訓話，視出人頭地爭第一為人生目標，保險跟打拳一樣，都非常適合他，「我鍾意保險唔止係為錢，雖然錢都好，但我最鍾意鬥排名！我高你一格，我要串你成世，舉例我聽講幾日前贏咗舊年嘅請人大獎，我係全公司請人最多，我打贏第二名，我呢世都排過第一，我就係鍾意呢種感覺。」雖然他自言會交足貨每星期練4至5日，但今次對手是真拳手鍾培生，連教練亦坦言暫時勝算不高，萬一輸了有何打算？「打輸一次又點啫！唔係完結㗎！收一百萬，咪拎住50萬再挑第二個挑到贏為止囉。最緊要贏得多過輸，如果成世唔輸都唔好，舉例鍾生旳問題就係佢唔輸得，呢個係佢最大弱點，我聽講佢未輸過嘛。」畢業於牛津大學的林作，自言擁有英式幽默，跟畢業於美國南加州大學的鍾培生大有不同，「我哋好鍾意自嘲，笑自己失敗，我哋睇自己睇得輕，佢睇到自己好重呀！」