我記性一向唔好，記憶力差到一個地步：入場睇戲，散場，立即忘記晒劇情。當然，並非睇每齣戲都會有這種失憶情況出現，印象中《魔盜王》系列最能夠令我過目即忘，其次是《叛諜追擊》系列，還有一大堆《搞乜鬼雜作》等等。先旨聲明，引發短暫失憶倒不一定是爛片所致，有時只因將焦點投放在電影的其他元素。畢竟，有啲戲，賣點非關劇情，故事講乜真係唔多重要。
文：AnnLo
約翰保也加除了擔正主角，更兼任監製。他在片中飾演上集英雄史特加潘塔高將軍(艾迪斯艾巴飾)個仔。
細個睇日本卡通，逢一至五下午必追《大武士》、《鐵甲萬能俠》、《三一萬能俠》、《黃金戰士》等，縱然劇情千篇一律：主角為了偉大又崇高的原因——保護地球，於是駕駛大大隻機械人，對抗樣衰衰外星侵略者或怪獸，但我依然為之著迷，事關只在意機械人有幾型，武器有幾多，或者變形合體有幾複雜，地球很危險？我根本冇擔心過。
或許很多人都有跟我差不多的童年回憶，所以當《悍戰太平洋》於2013年上映，隨即引起話題，全球票房更錄得4億美元。電影公司理所當然添食，然而台前幕後都執過位，上集導演、亦即是應屆奧斯卡最佳導演得主吉拿域戴拖路，在今集《悍戰太平洋2：起義時空》擔任監製，改由Netflix原創影集《漫威夜魔俠》導演史提芬德禮執導。主演有《星球大戰：原力覺醒》及《最後絕地武士》的約翰保也加、奇連伊士活個仔史葛伊士活、有份參演首集的菊地凜子，還有張晉，以及我最愛的景甜。
既真實 又保留懷舊味道
據悉，導演史提芬德禮跟很多香港麻甩佬一樣，都是五、六十年代日本特攝片的fans，自小已鍾情「打怪獸」類型的電影及劇集，難怪他接受訪問時不忘提到，透過現今的拍攝技術，既要製作出感覺更真實、同時又保留懷舊味道的原創怪獸電影，「當怪獸襲擊城市時，觀眾會馬上感受到巨大的威脅和恐怖，感覺逼真。」他又透露，今集的怪獸軍團擁有更強大的力量和兇猛個性，而且攻擊模式各有不同。至於人類一方的機甲獵人，則會呈現更先進的武器，而且速度更快更靈活。
此外，史提芬德禮特別講到片中的機甲獵人小佩(Scrapper)，「每部機甲獵人都是駕駛員個性的延伸，因此風格各異。小佩能捲成球狀並快速撤退，搭載了如煙霧彈般的防禦系統，反映了小孩會考慮到的因素。我們特別安排在電影開場時，突出其靈活和動感的有趣畫面。」照咁講，小佩的最大功能，似乎是提供笑位。
amFUN聖誕狂賞🎁狂送UNICO迷你遊戲機、主題公園門票、Panasonic鏡燈👉
