由DJ麻利主持的黃Viu節目《同煲同BLOW》,第三集請來有「港版木村」之稱的歌手洪嘉豪(Kaho)討論日劇,當然不得不提「日劇天王」木村拓哉的大熱神作,Kaho更即席「神還原」木村在《悠長假期》玩彈彈波的經典埸面,令麻利睇到「O哂嘴」。
爆媽咪係木村迷
男神木村拓哉的劇集如《悠長假期》、《律政英雄》、《戀愛世紀》等,曾創下不少收視神話,近年被指與「木村」撞樣的Kaho原來也是木村迷,他大爆,「媽咪都係木村迷,陀住我時經常睇木村劇集,我覺得有少少胎教影響,所以似樣都可能有啲關係。」對於被褒獎為「港版木村」,Kaho自言受不起卻又心裡暗爽,「坦白講,有時自己都覺得有少少似,但我唔會認㗎,不過好開心,佢咁靚仔。」談到木村,他在《悠長假期》玩彈彈波冧掂山口智子的經典場面,至今仍為人津津樂道,Kaho就即席重演,他站在閣樓模仿木村拋波前的小動作,對著麻利唸出日文對白,相當入戲,而且一Take成功接回彈彈波,非常厲害,連麻利都大呼驚訝!
港版木村變大埔林村
不過,近期Kaho又再有新花名,由日本男神變身為大埔許願樹「林村拓哉」,他解釋,「事緣有人睇完我MV後留言,話我似木村,但打錯字做『林村』,有人回覆佢林村喺大埔喎,之後就有粉絲改圖,將我Key到成頭都係寶牒。」十分搞笑。