![](https://cdn.am730.com.hk/s3fs-public/styles/article_image/public/2023-03/10_30.jpg?itok=ibBk-VKG)
陳自瑤當年參加帶貨真人騷《識貨》時,表現認真亦著重互動。
無綫附屬公司TVBC與淘寶早前達成合作意向,年內將共同發展48場電商直播;頭炮請來陳豪與陳敏之,二人長達6小時的直播全場銷售額突破2,350萬元人民幣(約2,646萬港元),最高線上人數逾3萬兼登入淘寶直播間即時排行榜Top 2,成績斐然。
本月尾30日(下周四)將進行第二次跨境電商直播,參與藝人暫定落實有《識貨》首屆冠軍陳自瑤(Yoyo),另一位藝人身份將於稍後公布。是次直播內容主題圍繞無綫經典劇集,將內容結合到電商直播平台,將是無綫未來重大發展方向及項目之一,有關方面得到淘寶的戰略支持。
![](https://cdn.am730.com.hk/s3fs-public/styles/article_image/public/2023-03/09_12.jpg?itok=IMmTRnXo)
Yoyo私下原來係慳妹一名,並透露購物前會格價及查閱貨品風評,並謂不會胡亂將貨品推介給別人。
首次挑戰6小時直播帶貨
對於接「雙陳」陳豪及陳敏之棒成為第二次電商直播帶貨主持,進行為時六小時的電商直播,Yoyo坦言心情緊張又興奮,並謂自己為該個電商直播獻出了多個第一次:「我未試過正式真係做一個咁大型嘅直播帶貨Show,仲要係淘寶咁大嘅平台,所以都好緊張,對自己嚟講都係好大嘅挑戰。」向來做事認真的Yoyo,為了將最好及最抵買的貨品推介給受眾,更會花大量時間做事前準備:「因為都好多貨品需要去了解佢嘅用途、成份同其他所有嘢。今次挑戰六小時直播帶貨,都係人生從未做過嘅嘢。」
Yoyo又指自己平時絕不胡亂將貨品推介給朋友:「我不嬲做嘢比較謹慎啲同實際啲,所以我介紹親畀朋友嘅嘢,係真心覺得好用先至會介紹。所以如果我做帶貨活動,我都真係想推介一啲真係真心好用嘅好嘢畀大家。」
自認係慳妹
問到Yoyo私下是否精明消費者,她笑稱自己其實是慳妹一名,言談間盡顯精打細算一面:「本身我係慳妹性格,我買嘢多數會格價,睇吓邊度啲嘢平啲、品質好啲,亦都會睇吓網上面啲Comment。」再問是否「講價」達人,她則笑謂:「我自己有時買嘢都會盡量揀啲性價比高,又平又抵又高品質嘅貨品;講價方面,如果講到價嘅地方我都會盡量講嘅。」
![](https://cdn.am730.com.hk/s3fs-public/styles/article_image/public/2023-03/07_13.jpg?itok=vnx9qCBc)
Yoyo當時打敗了近年在內地帶貨成績驕人的陳嘉佳躋身決賽,足證實力有番咁上下。