煮．野食｜肥媽爆謝嘉怡花名叫排骨妹 真人原來好麻甩

肥媽Maria Cordero和陸浩明（6號）主持的無綫《煮．野食》最新一集邀來謝嘉怡做嘉賓。做慣「阿四」的6號今次終不用獨自執行任務，孖住靚女謝嘉怡撐船仔出魚塘撈魚。

6號大晒港式英語

由於謝嘉怡自小在英國生活及長大，肥媽要求6號用英文介紹「薑蔥蠔」，豈料6號卻將「Onion（蔥）」讀成「Alien（外星人）」，肥媽即一面嫌棄糾正其發音；不過6號並未因而「退縮」，更大教嘉怡港式英語「Eat Yourself」，非常爆笑。

外表靚靚女女的謝嘉怡，被肥媽大爆私底下相當麻甩，更被封「排骨妹」：「佢日日食排骨㗎，佢選完港姐嗰日都係想食排骨飯！如果想溝佢，帶佢食排骨飯、大牌檔、煲仔飯就得喇！」6號聞言即笑指嘉怡是男士夢寐以求對象：「簡直係男士夢想，食排骨飯都唔會嬲！」

6號接受訪問時開心透露節目首播反應理想，並笑指肥媽有意添食拍第二輯：「我聽到好似話第一日跨平台直播收視過咗17點，搞到我同肥媽都好開心。其實阿媽今次拍呢個節目真係幾辛苦架，不過佢一聽到個好消息，就即刻話想添食拍第二輯啦，真係好感謝一班同我哋一齊努力咗咁耐嘅工作人員。」6號更大爆神秘嘉賓陸續有來，敬請密切期待。