種族歧視呢個議題，喺美國再唔係「不能說的秘密」，黑人演員唔再被迫做諧星，而導演或以黑人為題材嘅劇本，亦愈來愈多機會得到投資者青睞(即使資金有限)，例如舊年嘅《NASA無名英雌》等。來到今年，黑人電影熱繼續燃燒，新一波熱潮由黑人導演──非裔美國演員兼編劇佐敦比爾(Jordan Peele)處女編導作品《訪‧嚇》(Get Out)揭開序幕，唔止勇奪美國開畫票房冠軍，成功以500萬美元成本，「鋸」出逾1億7,000萬美元票房，獲Rotten Tomatoes評為99%新鮮度，而imdb亦有8分，成為影圈熱話。文：Wing
佐敦比爾係邊位？
或者香港人對佐敦比爾呢個名字好陌生，事關呢位諧星，主演作品大部分都係美劇，而電影作品亦甚少喺香港上映。《訪‧嚇》今年1月喺美國Sundance電影節公映，口碑非常好，2月隨即喺美國公映，票房成績唔止超越同期大片，更喺一星期內不斷直線上升，場次愈開愈多。我之所以留意呢部戲，除咗因為睇過比爾編劇兼主演嘅趣劇《阿奇與阿皮》，亦因為陸續有電影網站文章分析呢部戲，而且佢紅到連香港都公映，(仲傳導演有機會執導真人版阿基拉電影)，咁嘅環境，梗係要入場「獵奇」一番。
我承認，入場前心情非常複雜，因為寫開喜劇嘅比爾，雖然有才華，但劇本質素同阿仙奴啲波一樣……咁海鮮，好似舊年嘅喜劇《奇樂咪圍貓》真係唔係我杯茶，但佢編劇嘅《阿奇與阿皮》又好好睇，對白設計用心兼精警。今次《訪》片亦係由比爾親自編劇，以黑人視點去講種族歧視，故事講述喺紐約當攝影師嘅男主角Chris，趁假期陪白人女友返屋企見家長，結果幾乎連命都冇。
理性探討
比爾早前受訪時提到，故事情節某部分結合親身經歷，一向喜歡睇恐怖片嘅佢，將身為黑人嘅聲音帶入恐怖片中，成為一個以「種族不同非我類」為「宗旨」嘅故事，當中嘅變態、血腥則成為扭橋重要元素。咪以為黑人一講種族歧視就會失控，比爾今次出色，除咗因為劇本設計巧妙、場景設計用心之外，亦因為佢理性探討呢個大議題，喺多場關鍵戲中，「溫柔」地利用各種技巧如鏡頭調度或對白設計，間接呈現白人對黑人嘅態度，而結局部分，據講亦因為拍攝時發生黑人遭槍殺事件而作出刪改。
齊集各路黑人演員
黑人拍黑人有咩好？其中一樣，當然係選角比白人精準，比爾今次起用年輕黑人演員丹尼爾卡魯亞為主角，相信大家對佢最有印象嘅，就係Netflix劇集《Black Mirror》。今次導演唔止俾佢擔正，仲用咗好多特寫鏡頭去拍佢。呢位演員比起大部分黑人演員少一份粗獷，眼大大，演起戲嚟表情相當柔和，而導演設計嘅主角為藝術家，非常適合佢剛中帶柔嘅容貌，表現屬水準之上；而戲中其他黑人演員仲包括Betty Gabriel、《衝出康普頓》拉基夫史丹費爾、《荷里活黑名單》史提芬活以及怒放笑彈嘅Milton ‘Lil Rel” Howery，每位都恰如其分，尤其是Betty Gabriel更非常亮眼。
《訪‧嚇》上映日期：即日
入App免費換走健康產品
