![梁祖堯估不到葛民輝一口答應參演《Di-Dar音樂劇場》。](https://cdn.am730.com.hk/s3fs-public/styles/article_image/public/2024-05/%E8%91%9B%E6%B0%91%E8%BC%9D%2B%E6%A2%81%E7%A5%96%E5%A0%AF%2001.jpg?itok=ErI79GYT)
梁祖堯估不到葛民輝一口答應參演《Di-Dar音樂劇場》。
風車草劇團主腦梁祖堯、湯駿業(AhDee)和邵美君,將首度夥拍葛民輝、岑珈其、何洛瑤(Sica)、鄧家杰(Kakit)等合演黑心喜劇《Di-Dar音樂劇場》,將於一同演出。早前公售由8月9日起於葵青劇院公演的21場演出,門票火速售罄。由於加場聲不絕,劇團現宣布將移師香港演藝學院再加開13場,門票將於6月5日(下周三)起公開發售。
有鬼有人 要生要死 又喜又悲
《Di-Dar》看似是驚嚇鬼故事,實質是爆笑劇場,身為編劇的梁祖堯透露創作起源,「幾年前有人想我同阮韻珊(合作編劇)幫佢哋搞個舞台劇,我哋寫完大綱,跟住仲好快寫咗一個關於校園同埋中樂嘅鬼故,但後來計劃擱置。到上年,心血來潮覺得唔好嘥,故仔幾好,就重新構思過,用返條大橋去寫《Di-Dar》。」阮韻珊介紹,「《Di-Dar》係一個關於『活着』嘅故事,我哋成日話做人要無遺憾,但係做人有無可能真係無遺憾?我相信無可能,反而喺無常嘅世界入面,我哋要學習點樣帶住生命瑕疵生活落去。呢個係一個有鬼有人、要生要死、又喜又悲嘅故事。」
再三加場 葛民輝後悔
今次《Di-Dar》主要分兩條支線,分別是梁祖堯、湯駿業AhDee及邵美君飾演的舊生,以及何洛瑤Sica、鄧家杰Kakit和杜曦駿Larry飾演的學生,而葛民輝則飾演校長,岑珈其則是貫穿眾多角色的重要一員。這次演出名單當中,最叫人驚喜的必數葛民輝,就連兼任導演的AhDee也表示能夠邀請到阿葛參與其中,感覺奇妙,AhDee說:「可以同阿葛一齊做Show,好夢幻,發夢都估唔到!因為我哋搵阿葛都係博一鋪,點知得到佢嘅回覆,仲約我哋見面,到而家成事,太不可思議。」至於阿葛,他笑言:「阿祖經朋友問我,話有個劇本角色啱我,想搵我傾。喺舞台現場演出係令我好興奮,而且聽講阿祖好鍾意食嘢,同佢哋排劇係唔會餓親仲會肥幾磅,聽落幾好,雖然故事未齊,但成件事令我好好奇,所以就答應了,但有啲後悔,而家加咁多場,去完葵青劇院再去演藝學院。」
爆肚見招拆招
風車草的演員慣性爆肚,今次有搞笑能手阿葛,還有岑珈其、Sica、Kakit這些年輕一代甚具喜感的演員,再加上阿祖揚言創作劇本時瘋狂加入笑位,相信台下屆時必定笑聲不絕,但台上演出時可擔心笑到演唔到?阿葛坦言:「都驚排練玩到太熟絡就出事,而且風車草啲人壞壞地,佢哋喺自己啲Show都會爆肚,我真係怕台上會完全失控,完全返唔到嚟。」但阿祖笑言:「如果我哋俾你更瘋狂,你就會勒返住自己㗎喇!」