薛家燕感觸談顏國樑病逝 與蕭亮沒聯絡難證實死訊

薛家燕今日(30日)於馬鞍山出席依飛「腦有所依」保健產品活動，談到合作多年的顏國樑病逝，家燕姐表示對其死訊感愕然，「因為約在兩個禮拜前，我仲見到佢上梁思浩的節目，看來很精神，突然聽到佢肺炎感染當然好難過，因為跟佢合作好多集《真情》、《皆大歡喜》，尤甚是《十月初五的月光》，佢演全海景，跟我有感情戲，大家好熟。」其間，家燕姐一度感觸，眼紅紅，她續說，「記得去年請佢來我節目做訪問，感覺佢好積極面對身體的病，好樂觀，能夠活多一日就一日，最緊要唔好辛苦地離開，仲提醒我們要注意身體健康。當時佢把聲已有轉變，講唔到低音，係尖音，好積極求生，唔怕辛苦。所以佢離去，我係難過，都想跟他太太講聲，節哀順變。想起顏國樑對影視界的貢獻，值得永遠懷念。」她更表示如需經濟支援定必相助，並打算出席追悼會。

難忘蕭亮「攝位」招數

至於蕭亮離世的傳聞，家燕姐表示透過傳媒報道才得知消息，兩人已多年沒有聯絡，所以也難以證實消息。她憶述當年拍《皆大歡喜》的相處片段，「我仲讚佢好叻，個個鏡頭都攝到位，佢仲話搵食係要咁，佢好有學識又好幽默，聽講佢移民加拿大，聽到死訊都感難過。」她感慨人老了，總有離開的一天，希望他一路好走。