南韓電影進步神速，由盛產小品愛情片或喜劇，到今時今日升格為亞洲動作片強國，每年都有幾部媲美荷李活製作嘅大片誕生。今年就有由《燥底師兄生擒富二代》、《柏林諜變》導演柳昇完執導嘅《軍艦島》，由超班演技派黃晸玟、大隻型男蘇志燮及當紅新郎哥宋仲基，聯手《屍殺列車》上位童星金秀晏主演。電影上月底於南韓上映，錄得首日逾97萬觀映入場人次，勁收61億韓圜，超越去年神作《屍殺列車》，而呢股「破紀錄」氣勢已慢慢席捲全球。 文：Wing Lam
日本最早期石屎建築
軍艦島的確真有其島，原名「端島」，位於離日本九州長崎縣長崎港約18公里海面嘅小島，係一個約兩個足球場大小嘅人工島，由於外形似日本軍艦，所以俗稱「軍艦島」。呢個島喺十九世紀末發現煤炭，當時正值日治時期嘅朝鮮，唔少人被利誘到島上當苦工，軍艦島後來發展成民生社區，島上嘅石屎樓亦係日本最早期嘅石屎建築物。雖然此島後來因日本改用石油燃料而被廢置，但因為島上嘅建築極富歷史意義，早被列為世界遺跡。
南韓春川重現
《軍》片耗資220億韓圜製作，製作費之所以咁貴，原因當然亦因為係period piece。電影以大批朝鮮人被騙往島上當苦工為背景，據歷史記載，當時島上環境非常惡劣，尤其被稱為「地獄階梯」嘅礦坑、宿舍及慰安所部分，令朝鮮人在島上生活苦不堪言。導演坦言係一張真實軍艦島照片令佢決定拍攝《軍》，所以製作時最重視場地布置。劇組於南韓春川搭起逾13萬平方米場景，布景部分達6萬多平方米，相當於實景3分之2大。而戲中可見，導演唔止重塑地獄階梯，就連歷史有記載嘅島上其他部分如市街、紅燈區及位於1,000米地底嘅礦坑、坑道、螞蟻洞等都搭得極為細緻，令電影拍出唔少極具壓迫感嘅鏡頭，觀眾猶如與主角一同置身煉獄。
入App拎12大商場蛇年利是封
