![鍾嘉欣在廣州開騷,全場爆滿。](https://cdn.am730.com.hk/s3fs-public/styles/article_image/public/2024-08/WechatIMG118.jpg?itok=i6nYm7Tp)
鍾嘉欣在廣州開騷,全場爆滿。
鍾嘉欣(Linda)日前在廣州舉行《Remember『記得』・鍾嘉欣演唱會2024廣州站》,這亦是她相隔10年再開個唱,反應熱爆,全場座無虛席,Linda好姊妹岑麗香、李亞男、苟芸慧、王君馨及好友黎諾懿與太太李潔瑩,亦拉隊到廣州捧場。Linda以經典金曲《一顆不變的心》為演唱會揭開序幕,期間更以勁歌熱舞上陣,掀起全場熾熱氣氛,不過最叫觀眾驚喜,莫過於Linda獻唱《我結婚了》,她還向觀眾扔花球,分享人生重要的一刻。
![鍾嘉欣認為最大挑戰係跳唱環節。](https://cdn.am730.com.hk/s3fs-public/styles/article_image/public/2024-08/WechatIMG122.jpg?itok=d7WMDzZQ)
鍾嘉欣認為最大挑戰係跳唱環節。
挑戰跳唱
為完成今次個唱,Linda連月來努力練歌排舞,重拾顛峰狀態,最終亦不負所望,她在演唱會一共演繹21首歌曲,當中包括為人熟悉的《其實我不快樂》、《一人晚餐》、《日夜想你》、《最幸福的事》等,最令Linda感到挑戰,絕對是以熱舞跳唱演繹《Love Love Love》、《得閒找你》及《夢伴》等,她說:「今次演唱會係花咗好多心思,一步一步計劃出嚟,最大挑戰係跳唱環節,始終好多年冇跳舞,所以我跳出舒適圈好努力咁練習,好開心最後可以好順利完成,希望自己可以繼續做到老學到老,繼續挑戰新事物。」
向觀眾扔花球
提到演唱會最難忘一幕,Linda不諱言是獻唱《我結婚了》並向觀眾扔花球:「唱呢首歌,之後扔花球畀觀眾,其實2015年突然結婚嘅消息,當時刺激咗好多錫我嘅人同粉絲,之後我再突然離開香港生活、生仔,好多粉絲都冇見證到我嘅婚禮,呢個環節好似之前結婚咁,分享番呢個重要時刻,而花球裡係好特別,有我寫嘅字句。」Linda續說:「其實成個演唱會,有好多令我感動嘅時刻,喺出騷前,我有個目的,就係上天透過我嘅正能量,將愛同關懷帶畀觀眾,好感動我喺今次演唱會成功做到。」
「處女黨」現身撐場
對於一班好姊妹與好友專誠到廣州撐場,Linda大感驚喜,她說:「唔知道佢哋會嚟,之前君馨又話要開會、亞男又話要返工,個個都好似好忙咁,佢哋突然間出現晒,好驚喜。」而問到屋企人可有到場?Linda指:「今次家人冇嚟,因為太長途,佢哋都覺得有啲可惜,希望將來佢哋可以睇到一次我嘅演唱會,我同囡囡講『唔緊要,媽媽會繼續加油,下次睇我演唱會,演出會更加勁嘅』,而我老公,佢一定急不及待完騷後喺網上搵片嚟睇。」
終於可以食熱氣食物
Linda又笑言完騷後要食好多煎炸熱氣食物:「我要食好多熱氣、好辣、好炸嘅嘢,因為呢排要好好養聲練氣,飲食上都好節制,完騷當然要食餐勁,同埋想第一時間返加拿大見我老公同啲小朋友,好掛住佢哋,我哋日日都有視像,有時短暫嘅分離,會令大家關係更加思念。」
![鍾嘉欣完騷之後最想吃煎炸食物。](https://cdn.am730.com.hk/s3fs-public/styles/article_image/public/2024-08/WechatIMG125.jpg?itok=wOkE1F5k)
鍾嘉欣完騷之後最想吃煎炸食物。