2018-08-07 12:10:00

韓星藝名搞笑來源河智苑個名來自經理人初戀

韓流大吹特吹，煲過韓劇都應該叫得出一個半個韓星名。

不過唔係所有韓星都用本名活躍於娛樂圈，好似河智苑、趙震雄、河正宇、張赫同馬東錫都係用藝名，而且背後嘅故事都相當有趣：

河智苑──經理人初戀

本名田海林嘅河智苑參加綜藝節目時稱，藝名來自經理人初戀，經理人希望借呢個名完成未能完成嘅愛情。而河智苑本人亦好鍾意呢個名，覺得聽起落好有氣質，所以就欣然接受。

趙震雄──借父之名

韓國實力派演員趙震雄原名趙元準，藝名源自父親：「為成為演員，我向父親提出借佢名字一用，我個人認為老竇個名好Man。」而佢爸爸聽完就話：「好，但未來在適當時候我要版權費。」

河正宇──原名太無聊

《與神同行》河正宇本名金聖勳，佢喺節目中話改名原因係本名聽落好無聊。而有趣嘅係「河正宇」呢個藝名本來屬於同公司演員金聖洙，但種種原因下令呢個名一直跟住金聖勳，令佢成為河正宇。

張赫──覺得經理人個名好型

張赫原名鄭鏞浚，佢話：「我20歲嗰年成功入選拍電視劇，嗰時好開心咁覺得自己要成為明星喇，每日練習親筆簽名，但有日聽到唔知邊位嘅經理人個名『張赫』，我覺得個名好型，就開始用這嚟做藝名。」

馬東錫──惡魔東錫

《神臂大叔》馬東錫以大大隻見稱，佢話佢本來都係叫東錫，但原本姓李，叫李東錫，而馬東錫係指「惡魔東錫」(韓語惡魔中魔的讀音是「MA」)，因為佢讀小學時古靈精怪，花名就叫惡魔東錫。