飯戲攻心專訪｜黃子華張繼聰陳湛文新喜劇的笑裡情懷

送牛迎虎，今年的賀歲片因戲院關閉而延期上映，經歷持續兩年多的疫情，社會氣氛大不如前，前年曾自編自導賀歲片《乜代宗師》的黃子華坦言，拍純搞笑戲已很難引觀眾發笑，喜劇必須轉化。在新片《飯戲攻心》中，他與張繼聰(阿聰)、陳湛文(Peter)合演三兄弟，透過港味濃濃的叉燒和幾頓家常便飯，散發讓人溫暖的情懷。

文：Grace 圖：關樂欣
髮型：Helen(黃子華)、[email protected] (張繼聰)、Anthony Wong (陳湛文)
化妝：阿玉(黃子華)、LevinaBo (張繼聰)、 Lisa. C Makeup Art (陳湛文)
陳湛文服裝：mijosu(外套)、eye's Buddy(眼鏡)
場地：wahaha partyroom

子華睇《三夫》長大

子華、阿聰和Peter首次合作，受訪時火花四濺，不時明寸互窒。在戲裡演大佬的子華自言是後輩，「睇佢地啲戲大！睇《三夫》(2018年)呀！當佢哋係前輩。」憑《三夫》嶄露頭角、在熱播劇集《IT狗》演「男B」的Peter回敬：「一個係神級演員，一個係我好尊重的師兄，同佢哋首次合作當然好緊張！好驚我呢啲小師弟或者後輩出錯！俾佢哋揶揄取笑。點知聰哥只會藐視自己，子華仲犀利，作為演員，接收能力好高，身體散發聆聽者的感覺。」子華竟回說，「我唔係好明你啲學院派講乜。」阿聰更說，「最緊要準時收工。」不過，Peter亦非自討沒趣，獲兩位盛讚他與王菀之(Ivana)是戲裡笑點發動機。

張繼聰藤條打子華

被兩位細佬奉為「神」與「哥」的子華直言，「我開始覺得自己似戴麟趾爵士、古人一樣。」阿聰和Peter卻揚言要為他開條黃子華路，阿聰續說：「我這類中生很懂規矩，叫佢做子華，佢話『白只都叫我做子華，但你叫我做子華哥』，但我很難衝破這點！」子華慨嘆，「佢已被這行玷污了清白的心靈，已經變成『世界聰』。有啲名好啱叫『阿哥』，例如發哥、四哥，但子華唔啱，所以叫我做『劑哥』！」查實劑哥大有來頭，是周潤發在《江湖情》和《英雄好漢》主演的黑幫大佬「李阿劑」的尊稱。戲中阿聰與子華爭鄧麗欣，阿聰認真表示，跟很多香港人一樣喜歡看他的棟篤笑和喜劇，今次親身見識他認真演戲的細膩一面，意外地發掘兩人都愛看拳賽，在戲裡更「大手出手」，阿聰自爆，「我要用支藤條打佢，本來佢戴著護脊，我好放心盡情打，點知打落去時，見到佢個護脊移位，但已收唔到手，一打就打中冇護脊的部位！」子華笑言可打回Peter補數，但坦言交出真反應，「好彩係雞毛掃，佢打完我都呆咗，好似被車撞了一下！」

談喜劇的演化

戲裡的兄弟情靠父親祖傳的叉燒維繫，阿聰形容就像就像香港人吃叉燒的情懷，「如劑哥所言，去到外國冇叉燒吃，足以令人落淚。」子華補充，「或者你有得食，但食落會知道唔係香港的味道。」問到有甚麼他們最懷念的家常菜？阿聰說：「小時候，媽媽常煮節瓜炒牛肉或菜心炒牛肉，我覺得味覺連埋感情一齊。」子華最懷念母親煮的吃雪菜肉絲麵，「快靚正，分量又多，每次食都會想起母親的味道。」他接著大爆Peter每3日要吃一次冬菇，Peter更正道：「係3個星期就會掛住冬菇的味道，最好是家人煮的，因為通常厚肉、入味又多汁。」談到近年香港人很難笑，子華坦言早前曾跟鄭中基討論過，一致認為已不能再拍純為搞笑而搞笑的戲，「所以我好鍾意呢套戲，佢有種情懷，當然有晒喜劇元素同戲劇效果，兩個親愛嘅兄弟鍾意一個女仔，同埋難度好高，用幾餐飯搞掂，𠵱家需要呢啲戲，同埋香港觀眾個接受力已唔同，純搞笑可以睇網絡短片一分鐘已經爆，所以真係要做到好引人入戲，先可以《飯戲攻心》。」金句王，果然係子華神。

新喜劇的笑裡情懷黃子華張繼聰陳湛文