圖一
圖二
淡出娛樂圈多年的「綺夢」張敏，近排復出，昨晚佢喺微博突然貼文，寫咗一篇似係告白嘅情詩，更附上周慧敏及自己早期扮男裝嘅劇照(圖一)，網民睇咗都以為張敏喺度向周慧敏告白，唔少網民留言：「兩位女神這是要出櫃的節奏嗎」、「支持兩位女神在一起」、「喜聞樂見」。
不過，之後張敏又再PO文(圖二)，似乎係想解釋，佢係懷念兩人閨密之情。雖然張敏同周慧敏兩人都已嫁作人婦，但唔少網民仲係留言希望兩人喺埋一齊。另外，亦有網民認為係張敏嘅炒作新聞，為自己復出做宣傳；亦有內地媒體指兩人近期要參予湖南衛視真人騷《我們來了》，果然有啲炒作意味。
內地媒體引述工作人員指，張敏同周慧敏傾偈時，覺得周慧敏同老公倪震好幸福，所以佢想要寫詩送俾兩人，只係朋友間嘅祝福。張敏隨後又喺微博澄清：「慧敏，我的好姐妹，這個夜，我又在想你，想起你我幾十年的友情以及那些風雨中一起走過的時光。」並貼上周慧敏與倪震嘅照片。
(圖一)張敏情詩全文：這一世，你安守著我，無約無期，看繁花棲滿枝，聽風推浪，只許一肩，這一世，榮華有你，落寞與你乍見，便是此生的共勉，於四季裡，描摹彼此生命的輪廓此一生，僅一念，重逢是我，歸來有你，以三千溫婉，揮淚笑對，願將這份守候，繪一幅清淺的水墨，於濃處相惜 ，在淡處相念，遠近相宜，便是你我恰好的相伴。若可，請許我守住輪迴與你同在，於雲淡風輕裡，銘刻深情。
立即更新/下載AM730手機APP 體驗升級功能
