![](https://cdn.am730.com.hk/s3fs-public/styles/article_image/public/2023-11/14e4d530-795b-11ee-bedf-7953296c415c.jpeg?itok=bsfAEdSP)
鄭世豪
TVB處境劇《愛·回家之開心速遞》一直深受劇迷同網民愛戴,贏盡口碑及收視。唔少劇中演員成功入屋,當中包括飾演「細龍生」龍力士嘅鄭世豪,佢喺劇中除咗與Luna(何沛珈飾)有感情線之外,佢經常與家姐「大小姐」龍力蓮(林淑敏飾)為爭奪「接龍集團」及「威龍百貨」承繼權而鬥氣,鬧出笑話連篇。
喺劇中戲份不少嘅鄭世豪,為劇集日以繼夜拍攝,不過佢喺噚日(1日)出IG限時動態稱被屈,鬧爆好人難做。
「教人家唱歌更高興」
喺噚日,「細龍生」鄭世豪喺IG連環出咗三個限時動態,首先佢喺自拍照寫上:「呢個世界係奇怪的,一直太好人太準時,習慣毫無怨言的我,就算今日天地間要等7小時,也會比人老屈等我的。」
他又開投票功能問大家佢應該「嬲爆炸」定係「得啖笑」,而大部分網民都改佢得啖笑算喇!再之後,鄭世豪再出限時動態,寫上:「呢份工真係越好人越難撈,係時候收自己皮!」最後,完成拍攝工作嘅佢,前往歌唱學校教唱歌,不過似乎仍未釋懷寫上:「教人家唱歌更高興,尤其見到學生進步神速。」
原文刊登於 Yahoo 娛樂圈