八十年代以「開心少女組」出道嘅袁潔瑩Fennie，近年少有作品推出，而佢上個月喺抖音開專頁分享生活片段，就被網民見到Fennie身型瘦削，擔心佢好似90年代患上厭食症咁再次暴瘦，紛紛留言希望Fennie健康快樂。
骨瘦如柴令網民擔心
袁潔瑩喺抖音第一條片係踩住健身單車打招呼，即使Fennie著住長褲，都睇得出雙腿好幼。Fennie最新一條片本來想感謝網友支持，但開口就食螺絲。片中Fennie露出一邊前臂，都係骨瘦如柴，加上雙頰無咩肉地，反而令大家擔心，甚至有人話「以為係黃貫中」。
▼袁潔瑩近照▼
拍《學校風雲》除剩內衣
今年53歲嘅袁潔瑩，16歲就被黃百鳴相入而入行，並以「開心少女組」出道，接拍電影《開心鬼》系列而走紅。其後喺1988年嘅《學校風雲》入面一場戲中被除剩內衣而引起話題。
90年代Fennie加入TVB實行影視兩邊走，夥拍過郭富城主演《風之刀》同《烈火狂奔》，以及鄭伊健主演嘅《雙面伊人》等。電影方面，袁潔瑩90年代拍過《鹿鼎記》等多套古裝片，因而受兩岸三地觀眾認識，更曾被網民選為「香港古裝美人」之一。袁潔瑩近年多數做義工，最近一次演出係2013年TVB劇《女人俱樂部》。
▼袁潔瑩舊照▼
曾患上厭食症
1994年袁潔瑩更涉足歌壇，但亦因為出唱片嘅壓力而導致患上厭食症，體重曾經得返74磅，佢仲覺得自己當時好似末期癌症病人！袁潔瑩多年後受訪時表示，因為無信心做歌手，於是不停做運動練氣，因此瘦咗十磅八磅。當時身邊人覺得瘦咗嘅袁潔瑩靚咗，令佢更加著迷要瘦，結果出事。Fennie指當時要媽咪喊住跪求佢食嘢，好在後來求醫先冇事。
感情方面，袁潔瑩曾經同音樂人徐日勤拍拖，後來更同富商劉鑾雄傳過緋聞。2005年Fennie被指同女商人阮嘉欣過從甚密，到2012年因性格不合而分開。
原文刊登於 Yahoo 娛樂圈
和記行集團70周年聖誕送7大厚禮🎁 冷氣機 |風扇 |車用揚聲器 立即帶返屋企👉
