早前Ada更親身走到茶舍打卡，見到現場佈置，令她大感驚喜。
VIVA成員姜咏鑫（Ada）今個月生日，早前她便迎來入行後首個fans為她舉辦的生日應援，早前Ada更親身走到茶舍打卡，見到現場佈置，令她大感驚喜，大呼：「原來有咁多人錫我！」
Ada坦言以往生日都是收到message或fans的DM祝福，生日應援是人生第一次，「今次佢哋幫我整咗個茶飲店嘅應援，有手幅、鎖匙扣、Postcard，呢啲都係第一次發生喺我身上，所以都係一個surprise。」Ada落舖打卡當日，有歌迷聞風而至，現場跟她唱生日歌、切蛋糕及送上禮物，「所以今年比我嘅感覺係超級唔同，而且覺得：『吖！原來有咁多人錫我。』嘅感覺。」知道歌迷於一個多月前已開始籌備，Ada除了感動亦十分識做，當日自掏腰包請全場fans飲茶，以表示對他們的謝意。
她又謂在生日應援上看到很多「新」面孔最令她開心，「見到有好多新面孔，但我問番佢哋原來其實係舊面孔。係喺我之前參加比賽完嘅一個市集見過面，過咗咁多年之後，我成為女團，我生日佢哋都特登到場送上祝福， keep住咁耐都有人支持我嘅感覺，呢一樣嘢係令到我好開心。」
至於生日願望，Ada先大賣關子，「可能對我嚟講係好事，對其他人唔知係唔係一件好事，哈哈。」原來她的生日願望是希望將來VIVA每位成員的生日都在工作中渡過，她解說：「一嚟喺工作中渡過代表我哋有job，同埋我哋可以一過生日；二嚟就係Mani（霍汶希）有講生日有job接嘅話，係一件好事，代表嚟緊keep住一直有錢賺。所以我覺得係一個祝福，大家生日嘅時候不如一齊搵錢，一齊賺錢。」
入App免費拎23大商場蛇年利是封
