《ERROR “WHAT’S GOING WRONG??” 2025》演唱會。(林俊源攝)
ERROR昨晚(25日)於會展舉行《ERROR “WHAT’S GOING WRONG??” 2025》演唱會，吳君如、樊沛珈、練美娟等都有捧場。年年食白果的四子惡搞叱咤，自行舉辦「即刻樂壇同人講頒獎典禮」輪流自嘲，郭嘉駿(193)將自己法拉利炒車、保錡與菊梓喬緋聞等都擺上枱，更自言大限將至，「少咗X街」反而人氣下滑，非常赤裸。適逢當晚是吳保錡生日，全場大合場「錯版」生日歌，經理人濟哥奉上一籠真壽包慶祝，惜壽包雪得太硬，無法重演掟壽包的亞視經典。何啟華(Dee哥)、保錡、梁業(肥仔)和193分別扮劉德華、友台長老曾志偉、陳百祥和譚詠麟，奉上《獨自去偷歡》、《 我至叻》、《天下無敵我愛你》X《俾獎金》和《愛情陷阱》等經典歌Medley，掀全晚高潮。
嘆跌級被COLLAR爬台
演唱會於8時半左右開始，四子登場接連唱出《無敵聖衣》、《野舞士》和《殺死我的經理人》後，跟觀眾打招呼，率先自爆兩年前九展會4場，一票難求，今年轉場會展，開一場門票都有剩。接著，他們換上出席叱咤頒獎禮的戰衣，自嘲又可以坐，193化身「心理大哥」擔任司儀 ：「我要行出嚟，如果唔係又俾人話我黑面！」他宣布ERROR獲「至尊唱作全能組合」，四子分享得獎感受時，肥仔扮喊表示：「如果唔係自己頒畀自己，呢世都攞唔到」Dee哥自言是公司第二隊，慨嘆近年被COLLAR插隊變三隊，連網上的「我最討厭組合」都輸給MIRROR。
自言大限將至
頒獎後，193繼續留在台上，向ERROR黑白相鞠躬，自言大限將至，直至香港人「睇人X街最開心」，笑談Dee哥「鳯凰不死鳥」墮深坑、肥仔被指似Candy@COLLAR，他重提去年揸法拉利撞倒婦人的意外，指haters睇到「法拉利撞阿婆」最開心，但他直言因被指有計劃部署事件感不快。他又談到保錡跑步健身舉鐵，迴響不及他為緋聞女友拎厠紙，稱他與保錡默默守護ERROR，「我哋咁多負面新聞，公司都冇話同我哋拆，因為我哋同公司有默契。」他又感嘆兩人少了亂講說話，但「行得啱對ERROR係錯」，因為「少咗X街，少咗人氣」
化身BIGBANG 肥仔披頭巾扮GD
193自彈自唱新歌《Keep Walking》前向fans說：「你哋陪我哋鬥長命，只要一步一步行落去，一定會去到我哋想去嘅地方。」唱畢後又次多謝fans：「多謝你哋，如果冇你哋我真係捱唔到落去。」至於保錡則化大紅小丑嘴唱《跑吧小丑》和《笑一個》，感慨表示，「有好多嘢喺人生唔需要講，但講出嚟，或者……唱首歌畀大家聽。」台上大屏幕則顯示海量連登的刻薄留言。四子又扮韓團BIGBANG大唱《Home sweet Home》，肥仔扮G-Dragon披頭巾唱歌，笑爆全場。
Dee哥講盼香港可encore
接著肥仔奉上最拿上的跳唱表演，將柳應廷(Jer)的《約齊靈魂在墳墓開生日派對》變成跳舞版，贏得全場掌聲，再連跳唱《Lady Killa》與《Mascort》。Dee 哥則在棟篤笑時間繼續講經，大談世界未日與香港前景，由龍樹諒漫畫《我所看見的未來》預言今年7月海嘯，談到熊貓「安安」、「可可」改名，建議龍鳯胎熊貓改名為「扑扑」、「佳佳」，繼而將話題帶去觀塘海濱Gen Z和新轉機，最後送上新年祝福：「留底嘅，祝大家2025年搵到免費嘅快樂，有可以消費嘅士多，唔怕世界末日，香港可以encore。」
大爆當年簽約出歌過程
然後氣氛一轉，ERROR自己扮演「星級嘉賓」，大齊昔日流行經典和友台遊戲節目歌曲，在encore則死腳膠身份登場，最後唱出道歌《404》前，更自爆當年簽約過程，Dee哥提議下合力填詞，將MIRROR團歌《一秒間》化為ERROR的《404》。
立即更新/下載AM730手機APP 體驗升級功能
