Edan昨日27歲生日，理所當然是MIRROR演唱會的彩蛋。
MIRROR昨晚(21日)於亞博舉行第6場《MIRROR FEEL THE PASSION CONCERT TOUR 2024香港站》演唱會，適逢當晚是呂爵安(Edan)的27歲生日，壽星仔當然是彩蛋主角，Edan既獻唱傳統中式生日歌，又用手機拍下全場過萬觀眾合唱英文生日歌的盛況。他多謝當晚捧場的父母和妹妹「小如豬」後，自言要認真「講經」。他分享一位養育10個孩子、喪夫及患癌母親的經歷，向來樂觀的他感慨人生很多事都無法控制，自言過去兩年亦曾動搖信念，故特地選唱《Again！》，引用其中的歌詞為這位母親打氣，「想跟每一位過得唔好嘅人，同埋呢位媽媽，講一句：『回憶多黑 都要再多一次期待的資格』。」
自命「呂布仙尼」
在彩蛋環節，Edan扮作自己已返酒店，其後升上台後，笑指要送上一首未綵排過的歌曲，原來是傳統中式生日歌，又自命是「呂布仙尼」，要唱「Happy Birthday to me！」其後要求全場觀眾大合唱英文生日歌，並用手機拍下這震撼時刻，他感激大家為他慶生，「作為一個對生日沒大感覺的人，你哋令到我對生日有返啲感覺！」昨晚和「小如豬」都有捧場，他亦公開多謝在場的「爵媽」、「爵爸」，「多謝你哋27年來的栽培，俾咗個好好的生活環境我，咁愛鍚我，支持我做所有嘢，如果唔係佢哋栽培和教導，我都好難今日企喺度，所以送啲掌聲俾我爹哋媽咪。」公認是「妹控」的Edan當然不忘多謝「小如豬」，更即場派心給妹妹。
慨嘆人生無常
接著，Edan認真表示要講經，解釋選唱彩蛋歌曲的原因。Edan表示經常收到一些DM，請他幫忙為面對疾病、打針、抽血等療程的爵屎(Edan粉絲)錄音打氣，通常他亦毫不猶豫就答應，但不知如何安慰別人，有時要錄很多次，他慨嘆，「點解呢個世界發生咁控制唔到嘅事情，點解人要面對咁多苦難？」
他透露半年前曾為一套電影客串，遇上一位爵屎小朋友演員，並與其母親聊天，發現這位媽媽竟有10個小朋友，雖然照顧不容易，但一家人仍感生活幸福。但4個月前，他收到這位母親的訊息，「佢話先生突然過身，佢囡囡心情好差，可唔可以錄音俾力量佢，我嗰刻反應係：『What the hell?』呢個世界太黐線，點解會突然間發生這種事，我立即答應，問她佢有咩可幫手，後來佢話我知，在兩個星期前發現自己患上cancer，仲要係第三期，我不能想像如果發生喺我或屋企人身上，感受會喺點，一定會不斷問點解，點解個天揀中我遇到這些事，一定好難受，！」
想過不再堅持 別向命運低頭
Edan表示也有邀請她們來看演唱會，幾日前收到這位媽媽的訊息，指病情沒好轉，想在餘下時間跟小朋友建立美好回憶，希望可以開心地看MIRROR演唱會；故此，Edan為對方安排睇生日場，「佢同我講覺得好辛苦，甚至唔想繼續堅持下去。我想分享呢兩年諗好多人生嘅嘢，開心真係唔係咁容易，點解咁多人生活喺苦難，咁多人面對挑戰困難呢，甚至我都試過覺得好攰，諗過唔好堅持就算，呢件事remind我，原來我同我兄弟嘅一舉一動，一言一行，或者推出的作品，可以俾力量同支持人，只要有一日你哋仲需要我哋，而我哋仍能俾力量大家，我哋一定繼續堅持落去，所以希望你都一直堅持下去。呢個世界好多人遇到不幸的事，或者控制唔到嘅事，但我哋唔好向命運低頭，一定繼續加油支持下去。」他以《Again！》的歌詞「回憶多黑 都要再多一次期待的資格」，鼓勵這位母親在抗癌路上繼續堅持下去。
Ian：夾咗18個半買蛋糕
唱畢後，MIRROR兄弟齊齊上台，隊長Lokman捧著生日蛋糕，Ian大爆每人夾份付費$18.5買蛋糕，壽星仔即席許願和吹蠟燭，Lokman表示再送多首《One and All》給大家，最後演唱會以《We Are》作結。
amJetso 送BIODERMA救星小紅瓶🩷護膚恩物 立即按此參加👇
