狄高達於《格2》中裝扮較前作成熟。
英國作家E.L. James暢銷情色小說《格雷的五十道色戒》系列，前年由狄高達莊遜與愛爾蘭最性感男星占美杜倫主演電影版，雖然觀眾睇完大喊失望，但該片依然橫掃全球5.7億美元票房。續集《格雷的五十道色戒2》繼續由狄高達同占美飾演主角安娜及格雷，從預告片可見，今次女方不再受控於男方，安娜終於威番次。 文：Wing
問：首集結尾，安娜選擇離開格雷，重新掌握人生，續集佢將會有咩經歷？
答：續集故事由安娜離開格雷數日後講起。佢雖然心碎，但仍然愛著及渴望擁有格雷，今次大家會睇到安娜好勇敢，容許呢啲感覺留喺心，好誠實地摸索自己嘅性需要及慾望……其實佢哋都想俾多次機會呢段關係，但安娜要求做主導。
問：今次兩人關係有咩改變？
答：呢個故事之所以旖旎，全因兩人嘅愛超越世間所有事，願意不惜一切保護呢份感情。佢哋決定選擇自己想要嘅嘢，就係要喺埋一齊，呢個殘酷嘅設定，令角色變得更赤裸、可愛，亦令電影可以製造更多空間，發展及深化兩人關係。
問：點解喜歡安娜呢個角色？
答：透過對性愛嘅慾望講述一個年輕女孩嘅轉變，我覺得好有趣；不過，安娜真正吸引人嘅，其實係佢嘅個性、思維和直覺，勇於探索個人對性嘅睇法，既自信亦懂得包容自己。
問：續集將會講述格雷患性上癮哪些背後原因？
答：會提及好多佢嘅童年經歷，例如小時候被虐待、被忽略，衍生出佢對人不信任等問題，觀眾今集仲會睇到佢柔弱及幽默等不同個性。
問：今次有咩新角色登場？
答：大部分新角色都同格雷童年有關，而佢哋亦敵視及反對安娜同佢喺埋一齊。
問：今集演出風格是否承接首集？
答：同樣會帶少許幽默感，我傾向傳統嘅搞笑方式，喺唔係笑位嘅地方搞笑。我成日覺得演出搞笑戲分時，係我自己另一個mode，效果似乎唔錯，希望續集同樣可以造到舒緩緊張氣氛效果。
問：經過首集嘅成功，今次重返劇組感覺如何？
答：要演繹一個咁多人鍾意嘅故事，接演第一集時，的確有啲壓力。今次係我第一次演續集，感覺好似返營地集訓咁，同時間，又覺得輕鬆咗，至少冇上次咁迷惘，我同占美都知道應該如何引領角色同故事。
問：同占美杜倫合作，感覺如何？
答：我哋依家已經有咗親密嘅因子！(笑)第一集製造咗一個安全、受保護嘅環境俾我哋，令我哋戲外成為咗好朋友，否則，拍呢部戲真係一場惡夢。續集我哋拍咗半年，大部分橋段都由我哋擔演，同第一集一樣，我哋有好多時間相處，成為互相扶持嘅夥伴。
問：拍攝戲中咁多床戲時情況如何？
答：拍攝呢類鏡頭，絕對係生理及心理層面嘅挑戰，必須小心處理。我同占美都希望，盡可能用身體語言向觀眾解釋，每幕床戲發生嘅原因，想演得真實啲，而唔係漫無目的地重複做同樣嘅事。
問：對於安娜喺續集呈現出獨立自主一面，你感覺如何？
答：獨立女性形象，對現代電影嚟講好重要，電影旨在達到提醒及鼓勵大眾，若果能夠深層次地將重點轉移到，鼓勵婦女認同自我價值，認為自己有能力及有人支持佢哋站出來，咁就真係意外收穫，超越我哋嘅初衷和目標，特別係依家呢個社會和政治環境下。
《格雷的五十道色戒2》
上映日期：即日
兩人於續集的關係將會大逆轉。
入App免費換走健康產品
