Tyson Yoshi一連四場的《My New World Order》演唱會,昨晚(8日)於九展圓滿結束,尾場邀得好友林家謙擔任嘉賓。Tyson完騷接受訪問時表示,演唱會一波幾折,當局因MIRROR演唱會意外收緊租用規管,開騷前一天才知審批結果,他坦言一度想過取消演唱會,他指出,原設計以「飛天」形式往觀眾席的小舞台,如今要用腳行,失了氣勢,但能順利完騷總算鬆口氣。他自評第二場表現100分,但張敬軒(軒公)睇騷的第三場表現略為失色,獲軒公安慰「做得好就唔好追,做得唔好就抹咗去」,大讚對方主動提點後輩「好Sweet」,打算請食飯答謝他。
與林家謙合唱賣唔出廣告歌《熱到除衫》
談到與林家謙爆笑互mean,Tyson無奈表示,「本來夾咗我話好熱呢,佢就話好熱咁你就除衫,然後就入嗰首歌《熱到除衫》,唔知點解佢中間會夾雜咁多真嘢喺度講。首歌係佢揀,佢話最近我係熱嘅代表,你好似有首唔知咩除衫㗎嘛,我話嗰首係賣唔出去嘅廣告歌,得58秒,我唱都未唱過,佢就話就呢首啦!」原本Gareth. T也會在尾場擔任嘉賓,但因為確診新冠肺而無法現身,他表示獲悉對方「中招」後即撩鼻兩次,幸好沒受感染。
哽咽唱《If I Die Tonight》憶已故粉絲
來到尾場,Tyson Yoshi特別感觸。當他唱到《If I Die Tonight》時,他憶述曾收到兒童醫院的醫生DM,獲悉有位12歲病危小妹妹是他粉絲,醫生指她只餘下數星期壽命,Tyson翌日即前往探望,如今小粉絲已離世,他感觸表示:「我只係做音樂,冇諗過自己成為人哋臨走前想見嘅人。」當時Tyson的豪宅被起底、女友Christy受到網民攻擊,Tyson指:「兩件事好撞…….一個12歲妹妹咁想生存,但啲網民就喺度X你老X......」演唱期間他一度哽咽,又自嘲「喊住開騷」愈來愈主流,半說笑道:「本身諗呢條橋係想整喊你哋,點知整喊自己。」
自言取消開騷或破產
Tyson原打算使用鋼鏈飛到觀眾席間的中央舞台,但因MIRROR演唱會意外,有關部問收緊措施而取消,他無奈表示,「失望當然有,諗住飛過去,點知要用腳行,氣勢上爭咁啲,但而家最緊要平平安安開到騷。」他表示,開騷前一天才能確認能否通過審批,擔心沒時間修改設計,「我哋要點處理第一日嘅觀眾呢?擺佢喺邊度呢?Check吓新年後先有期喎!」他坦言若要改期就寧願取消演唱會,「如果係咁氣勢冇哂,我寧願唔搞,退返哂飛,咁人力物力,仲有實名制呢?破產㗎啦!但台冇咗錢都要畀㗎嘛!我唔係好似其他人咁有大公司,我收到演出費其他嘢都唔理,我所有嘢都係自己袋度出去,所有嘢我都要承擔責任,咁風險都要自己承擔,所以係賭博嚟。」幸好團隊跟足指引,順利舉行。
收4個Bra一底褲
一連四場騷,Tyson獲粉絲掉了4個Bra、1個Tube Top及一條底褲上台,他強調非刻意安排,笑指:「你想我跪玻璃呀?」問到女友Christy有否詐型?他答道:「冇嘢喎,因為我冇帶返屋企呀嘛!最後唱《Christy》完場㗎嘛!(冧咗佢啦?)唔使死囉!」至於如何處置內衣褲?他笑言:「俾後台工作人員鍾意玩就自己玩啦!」