北角渣華道日前有新店開張，佔用馬路快線舉行拜神儀式。(FB群組「北角有樂」)
本港車位數目十分有限，不少駕駛者都只好將車違例泊在路邊，而部分店舖更會在路面放置雜物「預先霸位」。有網民近日就在北角看見有店舖一大清早便在路面放置一張摺枱，批評店方「完全冇考慮其他人」，惟其他網民細看之後，認為發帖者可以通融一下，「開張一日半日，唔洗(使)咁掛。」
有留言籲事主「放鬆啲啦」
在facebook一個北角地區群組，日前有網民上載一幅照片，可見渣華道近書局街路邊，有一間店舖在對開的快線馬路放置了一張摺枱，而店名尚未揭開紅紙、門外放置十多個開張花籃，發帖者形容「間嘢已經朝早開始擺張枱出嚟阻街，完全冇考慮其他人」。
不過，群組內其他網民似乎同情店家，認為開張大吉應該可以包容一下，「人地今日開張、喜事嚟、吾洗(唔使)下下報乜報乜慨(嘅)」、「人哋開張大吉拜神，又話人哋阻街」、「放鬆啲啦！一日半日姐！」
有網民支持事主：守法不應雙重標準
發帖者其後回應稱，開張儀式阻街是事實，「覺得有冇問題大家心中釐定。我又冇講過錯與否，話我小氣條友真係攪笑」，亦有人支持發帖者，「守法就唔應該有雙重標準。下下都可以通融，要法治定要人治」、「開張都要自律，唔係大晒。」
amJetso送太興鮮臘腸 👇立即按此參加
