{專訪}這些年法治陰霾已不僅是掛在咀邊的預言，而是愈演愈烈，活現在你我眼前。出任法律界議員18年的吳靄儀，6年前退下火線，但在抗爭行列繼續見她的身影，她還將從政18年的點滴寫下成書，回首香港人最珍重的法治價值。近年法庭處理不少政治事件，法官亦捲入政治漩渦，吳靄儀不無感慨，直言法庭在某些時刻「唔夠堅」，甚至認為個別法官的法治修養不夠深厚，因而自然傾向「統治者」的文化。
記者：鄭秀韻 攝影：鍾式明
吳靄儀認為，香港仍是非常值得大家守護的地方，並相信努力會有回報。
寫回憶錄緣起 不容檔案消失
吳靄儀花了約2年時間奮筆疾書，寫就厚300頁的《拱心石下──從政十八年》。有人選擇遺忘，甚至扭曲事實，她以書寫抗衡，為歷史留下記錄，「因為依家檔案消失得太快，啲人記憶消失得太快，要追查番歷史好有問題，所以好容易俾人歪曲，趁我仲記得、知道啲檔案喺邊時，將佢寫喺本書，等佢唔容易消失。」
吳靄儀的回憶錄不是歌功頌德，也沒有揭秘式爆料，書中記載她這一代為民主、法治奮戰的痕跡，從過渡期前後、居港權、23條立法等，每件大事獨立成章，細說從頭，帶大家走了一條時光隧道，重溫香港故事。
書中序章以不少篇幅觸及宣誓風波引發釋法，她認為，這次釋法是破壞力最大的一次，遠遠超出「解釋」的性質。「我寫呢本書時，唔止係過去嘅事，依家發生緊嘅事其實有關，所以每章開頭時亦講現在，然後講返後來，序章亦一樣，但最主要亦點題我18年喺議會做乜，就係要建立強而有力、一個受人尊敬、有獨立自由嘅議會，發生釋法、DQ，一連串嘅事，對議會好徹底破壞，所以呢個係整本書嚟講好重大事件，由咁近嘅事，可以講到我呢18年做乜，呢18年其實係尋找(香港)未來嘅旅程。」
久經戰陣 法庭議會街頭打仗
陳文敏形容這本書不僅是吳靄儀的從政小傳，更重要是它見證了香港這廿年來法治的興衰轉變。吳靄儀於1995年參選法律界，毅然從政，「點解我願意去選，因當時最重要係香港法治、法制能否平穩過渡……當時我哋知道要維護原有制度，要做好多以前冇做過嘅嘢……唔止係憧憬，係要建立一磚一瓦……」香港回歸兩年後，人大常委會因居港權案打響釋法第一槍，法律界史無前例首次沉默大遊行作無聲抗議，「(基本法)24條係居港權利，如果基本法可以俾你搓圓撳扁，基本法對我哋有咩保護？所以咪要去fight囉，所以呢本書全部大仗、細仗，陷崩冷打仗，要喺法庭打仗、喺立法會打仗、喺街度打仗……」
釋法對香港法治造成的破壞，她形容大到無以復加，「大家都知道(基本法)有158條，99年第一次釋法時已震撼世界，158條由法院提請人大釋法，有個框架，但你(人大常委會)無時無刻亦可以解釋基本法，任何部分你解成點，黑解成白，白解成黑，都對法庭有約束力，如果你真係去到盡，基本法有咩用？」最終人大常委會一次又一次釋法，「最後對宣誓風波釋法，簡直係離晒大譜，但上訴庭仍然話係咁㗎啦，仲要有追溯力，仲要解釋本地法律都可以，你(香港)個法制仲有咩用？」
吳靄儀對法官滿有意見，並無因身為法律界一分子而留口，反而愛之深，責之切，「書中亦有批評，尤其宣誓案，我話如果上訴庭咁講都啱，我哋仲有咩法治可言？我覺得去到某啲位時，法庭唔夠堅，終審法院(處理)『吳嘉玲案』非常之堅，但到『劉港榕案』時係投降嘅……」
她不認為是個別法官的問題，「有啲法官講埋好唔等使嘅嘢，例如『一股歪風』，但整體嚟講，我覺得唔係個別法官嘅事，就算個別法官去到呢啲位，冇盡努力保障香港呢一制，但究竟呢啲法官，佢係飛黃騰達定係冇乜前途？你要睇整體環境，法庭究竟堅強到咩程度，我覺得呢個值得疑問嘅。」
書名取自舊立法會大樓拱門頂中央的梯形楔石，必須不偏不倚，才能抵住左右兩方勢力夾攻。
兩種文化衝突 法官傾向統治者
社會嚴重撕裂，有人指法官亦難抵政治壓力，吳靄儀說，「唔係一個政治壓力咁簡單，因普通法係一樣源遠流長嘅嘢，係你終身嘅價值，我有時覺得我哋嘅法官，法治修養唔係好深……」記者聞言面露訝異神色，她不禁笑問：「覺唔覺得出奇？」然後訴說「兩制」的差異，「普通法嘅傳統，係一個好individual base，我哋讀法律，係始於一個個人有嘅權利，不可侵犯嘅權利同自由；中國五千年文化，個人要為整體犧牲、聽話先至係啱……係兩個文化嘅衝突；所以你會覺得係咪法官受政治影響、係咪染紅？其實我覺得唔係，覺得係你自然傾向統治者嘅文化，唔好唔記得，我哋嘅法制依家係切斷咗，唯一缺口係終審法院內仍有啲外國法官。」
她並說，「依家(政府)愈嚟愈講條文、愈嚟愈唔係講法律點應用」，她形容那種手法猶如「強搶民女」，「拎條法例嚟話你聽要點……」她不無自責，「都係我哋唔啱囉，過去18年冇建立好堅實嘅法治文化，所以成日見(政府)同你講條文黑白，市民都係咁嘅，都係覺得條文最重要，但你應唔應該告人呀？應唔應該去拉議員？……」
談起現時的議會質素，吳靄儀對視制度如無物、打破祖宗家法的人滿臉鄙夷，對政治人才被扼殺則深感痛心，「我哋當然有政治人才，陷崩冷都係非建制派，但你(政府)逐個扼殺佢……羅冠聰得罪你咩？呢個係非常好嘅政治人才，已經入咗議會，你都要踢返佢出去……」
「我哋艱難咋，但冇打壓我哋，對我哋打壓好有限……」吳靄儀從政的年代儘管也是在野，但那時候的政府對異見仍有若干程度的尊重，「因為九七前後仍有行政立法分庭抗禮，佢要尊重議員意見，所以我哋有give and take……但依家政府數夠票唔使理你，我同你講道理都冇意義，咪同你鬥爭囉。」政府對抗爭者的打壓更是重拳，「依家係一拳一拳打你，佢哋面對嘅打壓、面對嘅艱難大好多……」
她形容香港的現況，「做中國殖民地仲差過做英國殖民地！」她認為，這種敵對狀態在梁振英當政5年期間出現最大分別，「其實之前已經愈嚟困難，因為03年七一大遊行，中央對港新政策，亦有好多因素，但最大轉變係梁振英，變成完全……即係佢唔係一個管治香港嘅人，佢係一個執行命令嘅人……」
年輕一代自雨傘運動後瀰漫一股無力感，至今未散，「傘運沮喪係shock，唔知道發生咗呢啲事，唔知道日日都要去鬥爭，以為坐咗79日就掂，點知唔掂，咪好挫敗囉；但佢哋唔死得晒，雖然好多話以後唔好搵我，但你睇見阿聰(羅冠聰)、(黃)之鋒佢哋，搵另一條路，唔單止未死，仲好生猛，佢哋做法同我哋好唔同……我覺得佢哋經baptism of fire(戰火洗禮)，會搵到條路……」
已屆從心所欲之齡，吳靄儀仍然有火，但她對滿懷理想的年輕人，愛護有加，「佢哋真係會走出條路嚟，所以我好尊敬佢哋，有咩幫手一定幫，係佢哋嘅前途……」
吳靄儀的回憶錄《拱心石下》。
