教育局副局長施俊輝與港乒「一哥」黃鎮廷切磋球技（鄭泳舜Facebook）
仲有唔夠一個月就到巴黎奧運，一眾香港運動員都正如火如荼備戰，教育局副局長施俊輝就相約體院副主席鄭泳舜，一齊參觀體院設施，了解下一眾港將嘅最新備戰情況。
身兼乒乓球愛好者嘅施俊輝嚟到體院，自然好關心香港乒乓球代表隊嘅動向，嚟到乒乓球館，突然球癮大發，即興同香港乒乓球隊「一哥」黃鎮廷切磋一番。黃鎮廷輕鬆發球，施俊輝認真接發球，兩人球來球往，施俊輝都非常專注，有板有眼，頗具功架，打失一球，施俊輝都忍唔住稍露失望之色。港乒總教練李靜喺旁邊觀戰，都睇得佢好開心。施俊輝打幾板友誼波都咁認真，黃鎮廷同其他乒乓隊友會唔會都收到佢嘅鼓勵，喺嚟緊嘅奧運更加努力為港爭光？
與殘奧運動員交流
施俊輝同鄭泳舜今次參觀除咗了解學生運動員訓練安排，亦都關注緊接舉行嘅殘奧運，同BC4級硬地滾球運動員梁育榮同張沅，以及即將代表香港喺殘奧會角逐六個游泳項目嘅吳卓恩見面交流。鄭泳舜話，樂見政府近年積極支援體育發展，期望增撥資源之下，運動員可以憑住不屈不撓嘅精神，喺國際舞台上創出佳績。
