Ray Online｜梁君彥：立法會大樓擴建進入關鍵期　樂見議員「斷捨離」

立法會大樓進行緊擴建工程，主席梁君彥形容工程進入關鍵期，相信全部議員都可以如期喺今年11月底開始陸續搬入新辦公室。梁君彥話樂見唔少議員同助理已經開始執嘢，開展「斷捨離」。

梁君彥今朝同立法會秘書長衛碧瑤、副秘書長同政府跨部門團隊就擴建工程，聯同工程承辦商舉行每月定期會議。一班人喺會議之後去工地考察，實地掌握工程進度。梁君彥話好開心見到新建議員樓層(11至14樓)嘅工程進度符合預期，承辦商預計今個月內可以完成安裝幕牆同鋪設機電設施。到今個月底，秘書處科技部同事同電訊服務承辦商就可以入去上述樓層同議員嘅新辦公室，開始鋪設網絡設施。

11月底起陸續搬入新辦公室

工程進入關鍵期嘅同時，立法會秘書處已經聯同搬運公司去到所有議員辦公室，了解每間議員辦公室嘅特定需要，方便幫佢哋搬嘢。梁君彥相信只要大家做好準備，搬遷一定會事半功倍。