梁美芬錯叫梁君彥做「主人」（YouTube截圖）
立法會今日會議發生離奇一幕，話說立法會今日繼續辯論由議員陳永光提出嘅「積極推動中醫發展，紓緩醫療系統壓力」議案，議員梁美芬發言讚完中國內地喺中西醫結合做得好好，話香港要「急起直追」，點之突然食螺絲講咗「急起極追」，唔知係咪驚魂未定，發言完結後又叫咗立法會主席梁君彥做「主人」，然後佢意識到自己講錯，即時改正叫番做「主席」，尷尬一笑，講埋「本人謹此陳詞」，然後乖乖坐低。
梁君彥聞言無表情
畀人叫「主人」嘅梁君彥未等梁美芬完成晒發言，就點咗名畀下一位嘅議員鄭泳舜發言，梁君彥臉上冇咩表情變化，但無端端畀梁美芬叫做「主人」，內心有冇掀起波瀾呢？
梁美芬Facebook專頁亦有貼出佢今日嘅發言片段，但片段去到「急起極追」就完結，未有上載叫錯「主人」嘅部分。
amFUN聖誕狂賞🎁狂送UNICO迷你遊戲機、主題公園門票、Panasonic鏡燈👉
