Ray Online｜田北辰預祝73歲生日 自揭患白內障(田北辰Facebook圖片)
立法會議員田北辰聽日迎嚟73歲生日，多謝黨內一班兄弟喺立法會幫佢預祝生日。佢話一直都覺得歲數只係數字，最緊要保持心境年輕就唔會老，但最近有件事令佢想唔認老都唔得喎。
事緣佢前幾日返香港，望住機場大銀幕嘅航班資料睇到矇查查，星期三見特首李家超，坐喺佢對面隔咗3、4米都唔係好睇得清佢啲表情，心諗係咪近視又加深。於是田北辰就心血來潮，搵咗同樣係立法會議員嘅眼科醫生林順潮檢查，點知話田北辰個「鏡頭」發咗霉，點配眼鏡都搞唔掂，原來係開始有白內障。林順潮建議換過粒人工晶體，仲話換完包保視野開新篇，見到一個全新嘅世界，睇文件仲快過37歲。
田北辰：生鏽嘅刀都可以有鋒利嘅一日
田北辰話隨住歲月變化，無論做幾多運動、食嘢幾檢點、內部機能「Keep到幾Fit」都好，有啲嘢唔到自己控制。正如一個城市有啲嘢舊咗、老咗、啲人厭咗，就會慢慢失去吸引力，但只要加返新嘢落去，一定可以好似佢換咗人工晶體一樣，帶嚟全新景象喎。佢仲形容歲月催人，但生鏽嘅刀都可以有鋒利嘅一日！
amFUN聖誕狂賞🎁狂送UNICO迷你遊戲機、主題公園門票、Panasonic鏡燈👉
