自在社課程原名為「社工如何處理『低效能』的下屬？」，引起不滿（民間社福界資訊Facebook圖片）
每間公司都可能有「低效能」員工同「低效能」上司，點樣去改善公司效能的確考起管理層。推動「正念教練學」和提供正念課程的自在社主辦實體課活動，開放予社工參與，課程原名為「社工如何處理『低效能』的下屬」，但就令一眾社工感到冒犯，喺網上群起留言批評，有人直斥不知所謂，批評宣揚不正確價值觀，「諗得呢個題目嘅人，真係不適合做社工」，有人反問「下次講下『如何處理低效能上司』得嗎？」，另有人藉機申述業界問題，「講依啲前，請各社福機構先比（畀）番正常薪酬先」，「如何處理社福機構肥上瘦下的問題」。
眾怒難犯，主辦方喺壓力下亦聆聽民意，即場發揮正念精神，將課程名稱嘅「處理」兩字改成「支持」，全名就係「社工如何支持『低效能』的下屬」，不過未能平息民憤，留言嘅社工同網民都仲未肯收貨，有人直斥「字眼改，mindset （思維）未改」，有人直接點明問題，話「重點係 『低效能』，標籤同事」，有人就慨歎「其實社工最低度都識唔好亂咁labelling（標籤）啦」。
自在社課程改名為「社工如何支持『低效能』的下屬？」，仍未能平息眾怒（民間社福界資訊Facebook圖片）
網民倡改名「如何變得高效能」
有人更加幫佢諗埋題目，將「低效能」倒轉講，話「如何讓下屬變得更高效能」就得，或者將「效能」字眼改做「動機」，就算係「低動機」都好聽過「低效能」，就咁聽又好似幾有道理喎。
翻查資料，自在社過去曾經舉辦過唔同課程，題目包括「社工如何面對HEA做的同事？」、「如何成為優秀上司／督導？」，當時就未見惹起社工不滿。
自在社曾為前線社工舉辦課程，協助應付無理上司的要求（自在社提供）
自在社創辦人道歉︰日後更小心
自在社創辦人周華山向Ray承認今次傷害咗唔少社工，自己幾日嚟受到唔少批評，都感到難過，願意真誠道歉，話今次執委會裡面其實都有8位社工，一齊傾課程題目時，考慮到過去做過「如何提升團隊士氣」嘅題目，得幾個人嚟，所以希望借住用負面意思嘅用字，吸引社工嘅管理層參加，而過去佢哋都試過就住前線職級，舉辦過「社工︰面對上司無理要求！？向上管理的藝術」課程。
佢話，自在社一直宣揚嘅信念係「先處理自己」，所以「如何處理『低效能』的下屬」嘅答案，其實就係俾管理層反思自己嘅問題，「根源係團隊、管理層同埋機制，有冇理解下屬？給予足夠支援畀下屬？」
至於今次課程個由來，佢就話，課程係每個月一次免費畀社工聚會，今次係收到好多社工管理層反映，近年社會環境同社會氣氛變化，令到好多前線社工灰心，涉及人權、群眾，甚至關心青少年嘅工作都未必敢做，積聚好多壓力，有啲社工離職，有啲就選擇低效能hea做，加上社工嚴重人手不足，令管理層都好頭痕，今次課程其實想幫唔同職級嘅社工都有更好嘅溝通。不過，佢話，經過今次，明白社工壓力好大，對社會標籤更加敏感，即使有好嘅初心同策略，都會令人有負面感受，就此誠心道歉，日後定題目時會更加小心，又希望今次事件可以令更多人關心社工。
amJetso送太興鮮臘腸 👇立即按此參加
