科學館展盧煜明無創產檢互動遊戲（未來科學大獎提供）
香港科學館下周五（10月4日）開始至11月4號，將會舉辦「2024未來科學大獎展覽」，介紹歷年5位獲獎嘅香港科學家，以及佢哋嘅科研成果。未來科學大獎被譽為「中國諾貝爾獎」，得獎者自然唔少得被稱為香港最接近諾貝爾獎嘅人、新任中文大學校長盧煜明，佢喺2016年榮獲生命科學獎，係香港第一個攞得呢項殊榮嘅香港科學家，今次展覽自然會有佢嘅研究內容。
展陸錦標手寫筆記
未來科學大獎嘅其他得獎者包括2019年物質科學獎獲獎者陸錦標教授、2021年生命科學獎獲獎者袁國勇教授和裴偉士教授，以及2022年數學與計算機科學獎獲獎者莫毅明教授，佢哋嘅科研成果屆時都可以喺展覽睇到，包括陸錦標教授嘅珍貴手寫筆記、袁國勇親筆簽名自傳等。
除咗豐富資料，場內亦都有互動免觸式動作遊戲「破解血漿游離DNA密碼」，參加者可以模擬通過盧煜明研發嘅「無創性胎兒染色體異常檢測」，辨別胎兒的性別或疾病，透過小遊戲了解技術原理。
