前歌手袁鳳瑛被控訴做德育導師手法有問題
主唱《天若有情》的前歌手袁鳳瑛，離開幕前之後修讀輔導及心理學，多年來經營德育及演藝教育中心，進行家庭輔導工作。早前有網民喺社交平台發文，聲稱童年時參與過袁鳳瑛舉辦嘅課程，令佢留下童年陰影，更指控袁鳳瑛對事主媽媽出言侮辱等，獲袁鳳瑛以千字文回應。
袁鳳瑛解釋當事人媽媽愛揸車
有傳媒向袁鳳瑛求證，袁以千字文回應時承認知道發文者是誰，聲稱跟進該個案幾十年，並鼓勵當事人面對自己問題。袁鳳瑛指當事人已到外國生活數年，指對方要勇於面對問題，否則難以同家人釋嫌，而且會遷怒於他人等。袁鳳瑛回應中沒有否認發文者描述嘅事，例如只聽一面之言，就要求三四年班嘅當事人下跪認錯等，但強調自己的課程與同唔同機構合作。
至於當事人母親被當成奴隸的指控，袁鳳瑛就指佢地中心搞嘅活動要家長親身參與準備，或會令一孩家庭嘅小孩有誤解。而袁鳳瑛亦解釋當事人「叫老母車佢周圍去」的說法，指當事人媽媽愛熱鬧同揸車，不時會車其他家庭及小朋友出去玩。但係袁未有正面回應出言侮辱一事。
袁鳳瑛曾推出3張專輯
曾是酒廊歌手的袁鳳瑛，80年代曾參加TVB《新秀歌唱大賽》及亞視《未來偶像爭霸戰》，後來獲台灣音樂教父羅大佑賞識簽下，並曾推出3張專輯，《天若有情》以外，兒歌《阿花的故事》、《仙樂處處飄》都係袁鳳瑛嘅名作。完約之後袁鳳瑛未有留喺樂壇，教唱歌之餘同時修讀輔導及心理學課程，從事相關工作。袁鳳瑛表示曾經憑《天若有情》走紅後反而唔開心，更試過患上情緒病，一日要駛三四萬買嘢，更爭落幾十萬卡數。另外袁鳳瑛曾聲稱自細就有能力同靈體接觸，能夠感受到一個人嘅前世今生。
原文刊登於 Yahoo 娛樂圈
