![許靖韻聯乘的小背心開賣。](https://cdn.am730.com.hk/s3fs-public/styles/article_image/public/2024-07/ENT_61.jpg?itok=BTHrrGQb)
許靖韻聯乘的小背心開賣。
許靖韻(Angela)今年動作多多,除了早前完成廣州及肇慶首兩站的巡迴音樂會,最近她更踩入時裝界,跟服裝品牌「3MODE」合作,設計一系列屬於她的時尚服飾。昨日(20日)聯乘服裝正式上架,原本於北京為雜誌拍攝的Angela特別飛到廣州親自落舖宣傳,舖外迫滿fans,場面墟冚。
![許靖韻專程到廣州店打點。](https://cdn.am730.com.hk/s3fs-public/styles/article_image/public/2024-07/20240721_032544000_iOS.jpg?itok=wAlJCv1e)
許靖韻專程到廣州店打點。
Angela穿上自己設計的粉紅色小背心現身店舖,實行當人肉生招牌。現場所見,除了不少女fans課金支持Angela,就連男fans都穿上由她設計的粉紅色tee及貨車帽,除此之外,亦有fans由美國三藩市、台灣、上海及長沙等,專程到廣州活動簽名,實行瞓身支持。
提到這次設計中最喜歡的單品,Angela謂自己十分喜歡穿小背心,所以這次設計方向都以小背心為主,「雖然自己另一個別名係『小背心』,其實自己好鍾意着小背心,平時着好多,特別係夏天,屋企真係有好多好多件小背心,所以我諗如果講我最鍾意嘅單品,就係粉紅色小背心。」
![首次設計時裝,Angela全程投入,參與度極高,從Logo到衣服的衣辦都參與其中。](https://cdn.am730.com.hk/s3fs-public/styles/article_image/public/2024-07/20240721_032640000_iOS.jpg?itok=aRyg5gIC)
首次設計時裝,Angela全程投入,參與度極高,從Logo到衣服的衣辦都參與其中。
首次設計時裝,Angela全程投入,參與度極高,從Logo到衣服的衣辦都參與其中。她坦言最大困難是畫圖,「我自己畫工本身係好有限,所以好多想表達嘅嘢都好難,我用我僅餘嘅畫工去展示俾大家睇,再靠大家去想像。」由於畫功是「有限公司」,最後她向妹妹求救,「因為設計呢樣嘢我覺得係好需要畫得好靚,呢一方面我有搵咗細妹去幫手。」聯乘服裝首日開售,店外已大排長龍,Angela表示多謝大家支持,更乘機hard sell一番,「我覺得男女都可以買,女仔夏天點都要有小背心看吓門口,男仔都可以買俾女朋友嘛。」
![Angela謂自己十分喜歡穿小背心,所以這次設計方向都以小背心為主。](https://cdn.am730.com.hk/s3fs-public/styles/article_image/public/2024-07/20240721_032513000_iOS.jpg?itok=uXXwE1-d)
Angela謂自己十分喜歡穿小背心,所以這次設計方向都以小背心為主。
對於穿衣之道,Angela認為是將自己最好的體形展示出來,「夠fit係我最大嘅要求,其實每個人嘅body shape都唔一樣,所以我覺得着衫最緊要第一係舒服,第二我覺得係夠fit,因為我曾經試過好肥,所以喺着衫方面都落咗好多苦工,希望望落去可以係再瘦啲俾人嘅感覺。」至於將來會否推出自己的品牌,她直言絕對有想過,同時亦知道非常艱難,而且曾向不少前輩取經,「希望可以藉住今次同呢個品牌嘅聯名,學習到一啲skills先。今次嘅聯名對於我嚟講好有幫助,因為令我更加清楚成個運作,會係我開展自己品牌嘅第一步。」
![許靖韻](https://cdn.am730.com.hk/s3fs-public/styles/article_image/public/2024-07/20240721_032806000_iOS.jpg?itok=tck_O8iO)
許靖韻