Yumiko近日攜9歲梁浸浸回流返港重新生活。
鄭希怡（Yumiko）日前接受新城《QK玉瑛室》節目訪問，節目上她大談近況，並宣傳下周推出的新歌《Lady King》，原名「鄭列瓊」的Yumiko表示：「首歌係講我自己『瓊姐』，因為我細個喺慈雲山讀書，所以有個名叫『慈雲山瓊姐』；今次亦都首次挑戰唱rap，用咗廣東話、國語同上海話擺喺入面，3個語言都代表我成長嘅一部份。」
Yumiko在疫情期間與老公梁學儲（Andy）及女兒「梁浸浸」舉家移居上海，至最近正式回流返港，她表示：「我哋喺上海住咗3年，因為疫情期間咁啱喺內地拍綜藝節目《乘風破浪的姐姐》，之後有其他工作同拍戲，返香港又要隔離，我父母一直住喺上海，佢哋就話不如留喺上海，我同老公傾咗之後，佢就帶埋阿女過嚟，一家人一定要一齊。」
女兒梁浸浸今年9歲，近日已正式開學，問囡囡返港讀書是否要重新適應？Yumiko表示：「佢喺上海讀書可以揀繁體定簡體字，我幫佢揀繁體字，所以返咗香港讀書唔使咁辛苦。」Yumiko又言十分享受做媽媽及照顧女兒，同時希望陪伴女兒經歷不同階段，問梁浸浸是否像其他少女般貪靚？Yumiko表示：「佢好唔鍾意扮靚，買裙畀佢都唔著，寧願著T恤短褲，佢對靚未有概念，不過佢好獨立，好有自己諗法，幾似我同老公。」
Yumiko又提到當初和老公並沒想過結婚，卻在2012年接受Andy求婚，「嗰年我哋去咗泰國畀個生日驚喜朋友，嗰個朋友係應采兒，我同佢企喺泳池邊影相，兩個一齊向後跌咗落後面嘅樹林，應采兒掛咗喺樹，我就喺3樓跌落兩嚿大石中間，康復期間仲戴住頸箍，行路又唔方便，喺我最醜樣時，佢就同我求婚，當刻我覺得呢個男人唔錯，其實我有咩事或傷殘佢可以走，但佢選擇婚姻，咁既然佢願意試，我都願意試。」
Yumiko讀書時霸氣叫「慈雲山瓊姐」。