![鍾慧冰到新城廣播接受薛家燕、思敏和范振鋒主持的《開心大派對》。](https://cdn.am730.com.hk/s3fs-public/styles/article_image/public/2024-08/%E5%B7%A6%E8%B5%B7_%E6%80%9D%E6%95%8F%E3%80%81%E8%96%9B%E5%AE%B6%E7%87%95%E3%80%81%E9%8D%BE%E6%85%A7%E5%86%B0%E3%80%81%E8%8C%83%E6%8C%AF%E9%8B%92%281%29_0.jpg?itok=Rubu3ufW)
鍾慧冰到新城廣播接受薛家燕、思敏和范振鋒主持的《開心大派對》。
67歳前港姐鍾慧冰(冰姐)日前到新城廣播接受薛家燕、思敏和范振鋒主持的《開心大派對》之「開心家訪」訪問,冰姐透露和家燕姐已廿多年沒坐在一起聊天,二人在節目中大談健康,不過熱愛工作的家燕姐,曾拒絕經理人兼大女兒珊珊安排給她的悠長假期,家燕姐表示:「我話唔好,我一休息就好閉翳,冇活力令自己扮靚出去見人,覺得自己冇用咗,我話幾日假期就得,我寧願做嘢,做嘢反而頭腦仲靈活啲,唔會同社會脫節,所以長者真係要多啲參與活動,令自己開心啲。」
![鍾慧冰2016年突然患上血管炎,以致右手和右腳不能郁動。](https://cdn.am730.com.hk/s3fs-public/styles/article_image/public/2024-08/%E9%8D%BE%E6%85%A7%E5%86%B0.jpg?itok=zsY1oxfT)
鍾慧冰2016年突然患上血管炎,以致右手和右腳不能郁動。
冰姐重提自己2016年突然患上血管炎,以致右手和右腳不能郁動,「係免疫系統出咗事,自己打自己,襲擊我啲神經,同埋我啲血管發炎指數好高,右手右腳唔郁得差唔多年幾,啲手指完全冇力,連名都簽唔到。」家燕姐聞言即謂:「嘩,好大件事喎!」冰姐續說:「佢哋話呢個病好容易就走(死亡),因為冇藥食,惟一可以食類固醇,但食得多又唔好,我食咗三個月,一日食9粒,食到塊面腫晒,變咗豬頭咁,好彩慢慢控制到。」
後來冰姐用了兩年時間才慢慢可以走路,但康復的路仍十分漫長,除了要做物理治療,還要每4個月驗一次血檢查身體發炎指數,「一出事我就戒煙,因為我要條命,又完全唔飲凍嘢、戒糖,經常保暖,以前凌晨3點先瞓,依家9點幾就瞓。」冰姐更表示:「我忍受唔到成世右手右腳唔郁得,除咗去廁所識自己去,乜都做唔到,好痛苦,同個癈人咁,所以我同自己講一定要好番。」家燕姐讚她:「好叻女,大步檻過。」
![鍾慧冰現時非常注重健康。](https://cdn.am730.com.hk/s3fs-public/styles/article_image/public/2024-08/%E8%96%9B%E5%AE%B6%E7%87%95%E3%80%81%E9%8D%BE%E6%85%A7%E5%86%B0.jpg?itok=Xlcd_U5e)
鍾慧冰現時非常注重健康。