![《風林火山》等足7年傳年底上映 億元鉅製麥浚龍執導 金城武拍完神隱](https://cdn.am730.com.hk/s3fs-public/styles/article_image/public/2024-07/fb3cc2f0-44d9-11ef-b7d9-c14957fbacf2_1721289670.jpg?h=1fa18f55&itok=g_hYxyln)
《風林火山》等足7年傳年底上映 億元鉅製麥浚龍執導 金城武拍完神隱
重本製作嘅《九龍城寨之圍城》喺香港收過億票房,大製作港片似乎再次受觀眾注視。影迷一直期待麥浚龍Juno執導嘅億元鉅製《風林火山》,但係電影2017年開工之後,上映日期遙遙無期。Juno受訪時被問到《風》幾時上,多數都係話搞緊後期。
![Juno年頭開完音樂會,呢期會唔會搞返《風林火山》嘅後期?](https://cdn.am730.com.hk/s3fs-public/styles/article_image/public/2024-07/6972f790-44bb-11ef-9d9f-11001e84c5b3.png?h=351b2f77&itok=WZpafYtU)
Juno年頭開完音樂會,呢期會唔會搞返《風林火山》嘅後期?
不過近日有傳媒訪問《九龍城寨之圍城》出品人陳羅超,陳生透露佢知道《風林火山》排喺年底上映!陳生亦指出,由於片中演員拍攝時距今至少5至6年,因此難以估計觀眾係咪接受。
的確,《風林火山》2017年中開工,拍至2018年3月完成拍攝工作,莫講話演員,連個世界都出現大量轉變。劇組喺片場搭建銅鑼灣街景,但係時至今日,仲有幾多鋪頭位置呢6年都冇變?相信Juno身為導演都要花唔少功夫處理。
![風林火山](https://cdn.am730.com.hk/s3fs-public/styles/article_image/public/2024-07/62dcb7e0-44bb-11ef-bf59-4036d0cda8fd.jpg?h=920929c4&itok=k24D2G5i)
風林火山
而《風林火山》備受注目嘅另一原因係,有傳拍攝過程中Juno同台前幕後有唔少磨擦,男主角金城武、梁家輝、任賢齊同執導第2套長片嘅Juno意見不合,幾位嘅開工檔期數以月計。而金城武拍完《風林火山》之後更加神隱至今,未再有拍新戲。另一當事人任賢齊曾經澄清冇因為Juno要求拍嘅吊威也戲受傷,又話期待作品面世。
![金城武拍完《風林火山》之後神隱至今](https://cdn.am730.com.hk/s3fs-public/styles/article_image/public/2024-07/62e32080-44bb-11ef-a3f7-c73971548f11.jpg?h=3e4b18b2&itok=GlGMkTM1)
金城武拍完《風林火山》之後神隱至今
麥浚龍2013年首次執導並編劇嘅《殭屍》反應不俗,觀眾對於歌手出身嘅Juno拍出水準感到驚喜。而《風林火山》雲集金城武、梁家輝、任賢齊、古天樂同劉青雲嘅「五條煙」陣容,加上喺銅鑼灣街景製造落雪效果,自然備受期待。《風林火山》嘅成本亦係話題之一,有傳係1億5千萬,但因為後期製作加上導演追求完美,成本升至4億。多年前有行內人同小編提起《風林火山》,就話成本大約3億元,加埋宣傳發行費要收9億元先回到本。如果條數係真的話,咁要靠內地上映先得,但係故事涉及販毒同地下秩序,會唔會有批文先?
《風林火山》好似有映期嘞,咁下一套等極都未上嘅《尋秦記》,幾時有得睇呢?
原文刊登於 電影LOL