![](https://cdn.am730.com.hk/s3fs-public/styles/article_image/public/2024-08/ccccc_1.webp?itok=iWyc_Y8-)
偶像劇《流星花園》當年紅遍兩岸三地。
偶像劇《流星花園》2001年喺台灣推出後,旋即紅遍亞洲,劇中飾演F4及杉菜嘅周渝民、言承旭、朱孝天、吳建豪及大S徐熙媛紅足咁多年,多個東南亞地區都有翻拍。
周嘉洛身高1米78
近年TVB力捧一批30歲樓下嘅新生代,於是網上有討論,假如TVB翻拍港版《流星花園》,選角應該點安排。網民建議杉菜由郭柏妍飾演,周嘉洛演道明寺、丁子朗演花澤類、孔德賢演美作,而西門就由吳偉豪飾演。
網民對於F4人選好大反應。首先,台版由言承旭演嘅道明寺換上周嘉洛的話,有人話二人身高差距太大,加上言承旭嘅輪廓同顏值真係冇得輸,好難相題並論。根據官方資料,周嘉洛身高1米78,言承旭有1米83,其實唔係爭太遠。角色個性孤僻但相當靚仔嘅花澤類,由丁子朗演都被認為格格不入,有留言認為同「朱凌凌」吳偉豪交換似乎有得諗。
朱晨麗反串做道明寺
至於杉菜人選冇太大異議,但原post主認為搵至王浩信反串做杉菜,朱晨麗反串做道明寺……亦有網民話呢個提議人選,就好似將《愛.回家之開心速遞》入面「島大」嘅角色套入去,套劇可以考慮叫《島大花園》。
新生代論知名度同前輩有距離,因此有人想睇千禧年上位嘅TVB小生花旦拍《流星花園》,搵佘詩曼做杉菜,道明寺、花澤類同美作就分別由林峯、黃宗澤、吳卓羲擔演。係幾適合嘅……廿幾年前的話。
原文刊登於 Yahoo 娛樂圈