今年美國各大頒獎禮都充斥熱鬧氣氛，全因為導演戴米恩查素帶嚟一部upgrade版《舞出真我》，將音樂元素由side dish變main course，拍出一部破晒金球獎紀錄、7項提名全數得獎嘅歌舞片(Musical)《星聲夢裡人》(La La Land)。主角賴恩高斯寧及愛瑪史東表現出色，當然有助電影紅遍全球，而對美國觀眾而言，此片更是意義非凡，尤其是經典Musical《萬花嬉春》女主角黛比雷諾離世，更令人懷緬五十至六十年代荷李活Musical百花齊放年代。導演戴米恩曾透露，創作劇本時參考過多部經典荷李活音樂劇，包括首場long shot、兩主角喺山頂約會以及愛瑪喺coffee shop打工等戲份，正好幫美國觀眾重溫舊夢。
文：Wing
《萬花嬉春》
《星聲夢裡人》前半段講述兩位主角薩巴斯安(賴恩高斯寧飾)與美亞(愛瑪史東飾)喺鬧市相遇，其中一段講到，佢哋一邊散步上山一邊鬥嘴，結他手薩巴斯安自稱唔係「玩」音樂，而係一個音樂家；而美亞亦堅稱自己唔係茄哩啡，而係專業演員，兩人邊唱邊跳。呢段戲，同1952年上映嘅經典歌舞片《萬花嬉春》(左圖)，主角Don挽著路邊燈柱，邊唱主題曲《Singin’ in the Rain》邊跳舞一幕，男主角嘅肢體動作非常相似，而查實，呢幕戲已經多次「被致敬」，例如《家有囍事2009》。
《Sweet Charity》
1969年由Bob Fosse執導嘅歌舞片《Sweet Charity》，再次呈現佢簽名式舞風，安排3位女演員使勁地扭腰、踢腳，再配合顏色鮮艷嘅舞衣，跳出一段以《There’s Gotta Be Something Better Than This》伴奏嘅歌舞經典橋段(左圖)。呢段舞步一直被視為歌舞片神作。而《星》片當中，其中一段奏起歌曲《Someone in the Crowd》、由美亞領舞嘅pool party舞步，無論係舞風抑或演員企位以至服裝，都極有當年Bob Fosse嘅神韻。
《甜姐兒》
1957年由柯德莉夏萍主演嘅歌舞片《甜姐兒》(右圖)，《星》片主要參考咗場景設計。《甜》片有幕戲講時裝雜誌編輯兼出版人Maggie、攝影師Dick同女主角Jo，去到巴黎凱旋門下取景拍攝，《星》片將同一場景套用喺美亞自己搞嗰場solo舞台劇之中，劇中劇嘅舞台設計，精粹在於米白色嘅凱旋門配搭女主角嘅淨色禮服。
《睡公主》
《星》片最為人津津樂道，甚至萬一冇咗會即時X聲四起嘅一幕戲——薩巴斯安與美亞於星空中起舞，呢場戲唔使諗，好明顯係向迪士尼經典動畫《睡公主》(右圖)致敬。《睡》片結局中，主角Aurora同Phillip本來喺皇宮舞會上跳舞，場景瞬間轉而到喺雲上共舞，畫面用色採用童話風嘅藍天白雲，而《星》片則較浪漫地用黑色星空，充滿現代感。
ADVERTISEMENT
【開APP領取】免費換領麥當勞叔叔之家利是封及揮春
